កំពង់ស្ពឺ៖ លោក កង វណ្ណារ៉ូ អភិបាលរងខេត្តកំពង់ស្ពឺ បានថ្លែងថា៖ រាជរដ្ឋាភិបាលកម្ពុជា ក្រោមកិច្ចដឹកនាំដ៏ត្រឹមត្រូវរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បាននឹងកំពុងបន្តលើកស្ទួយដល់វិស័យកីឡា លើកស្ទួយសុខុមាលភាពសង្គម ឱ្យពលរដ្ឋគ្រប់រូបមានសុខភាពល្អ កាយសម្បទាមាំមួន ក៏ដើម្បីឱ្យប្អូនៗ ជាយុវជន ជៀសឆ្ងាយពីគ្រឿងញៀន អំពើអបាយមុននានា។

លោក កង វណ្ណារ៉ូ បានលើកឡើងយ៉ាងដូច្នេះ នាឱកាសលោកអញ្ជើញជាអធិបតីភាពក្នុងពិធី បិទការប្រកូតកីឡាសិស្សមធ្យមសិក្សាជ្រើរើសជើងឯកថ្នាក់ខេត្តឆ្នាំសិក្សា២០២៤ -២០២៥ រៀបចំឡើងដោយមន្ទីរអប់រំយុវជន និងកីឡាខេត្តកំពង់ស្ពឺ នារសៀលថ្ងៃទី០៣ ខែមេសា ឆ្នាំ២០២៥នេះ។

លោកបានលើកឡើងទៀតថា វិស័យអប់រំកាយ និងកីឡាក៏ជាផ្នែកសំខាន់ អភិវឌ្ឍផ្លូវបញ្ញា ស្មារតី និង មួយក្នុងកម្មវិធីសិក្សារបស់សាលា កីឡាបង្រៀនឱ្យសិស្សានុសិស្សធ្វើការងារជាក្រុម មានភាពជាអ្នកដឹកនាំ បង្កើនការ គោរពខ្លួនឯង ការអត់ធ្មត់ មានទំនុកចិត្ត មានវិន័យ អភិវឌ្ឍជំនាញជីវិត និងមានទំនាក់ទំនងសង្គមបានល្អ។ នាពេលកន្លងមកវិស័យអប់រំកាយ និងកីឡា បានរួមចំណែកលើកកម្ពស់សុខភាព និងសុខុមាលភាពសិស្ស និស្សិត ប្រជាជនគ្រប់រូប ការប្រកួតជាលក្ខណៈជាតិ និងអន្តរជាតិមានការប្រែប្រួលជាវិជ្ជមាន ទទួលបានការអបអរសាទរ ពីមហាជន និងរាជរដ្ឋាភិបាល ក្នុងការកាត់បន្ថយភាពអសកម្មផ្សេងៗក្នុងសង្គម ជាអាទិ៍ការប្រើប្រាស់គ្រឿងញៀន។

ជាមួយនេះដែរ លោក កង វណ្ណារ៉ូ សូមថ្លែងអំណរគុណយ៉ាងជ្រាលជ្រៅចំពោះ គណៈកម្មការរៀបចំការប្រកួត អង្គភាពពាក់ព័ន្ធ អាជ្ញាធរមានសមត្ថកិច្ច ប្រតិភូកីឡាតាមបណ្តាក្រុង ស្រុក ដែលបានសហការគ្នារៀបចំការប្រកួតនេះឱ្យប្រព្រឹត្តទៅ ដោយរលូន ទៅតាមការគ្រោងទុកប្រកដោយភាពជោគជ័យ និងបរិយាកាសសប្បាយរីករាយ មុនវិស្សមកាលតូច និង ពិធីចូលឆ្នាំប្រពៃណីខ្មែរបានចូលមកដល់។ 

លោកក៏បានថ្លែងអំណរគុណ និងកោតសរសើរចំពោះប្រតិភូ គ្រូបង្វឹក កីឡាករ កីឡាការិនីទាំងអស់ ដែលបានចូលរួម និងខិតខំប្រឹងប្រែងប្រកួតអស់ពីសមត្ថភាព គោរពបាននូវបទបញ្ជានៃការប្រកួត និងសូមថ្លែងអំណរគុណចំពោះគណៈកម្មការបច្ចេកទេសទាំងអស់ ដែលបានដឹកនាំ និងគ្រប់គ្រង ការប្រកួតស្របតាម គោលការណ៍បច្ចេកទេស សម្រិតសម្រាំង រកឃើញនូវកីឡាករ កីឡាការិនីឆ្នើម ក្រុមឆ្នើមដែលទទួលជ័យលាភី នៃការ ប្រកួតនៅពេលនេះ។ 

ឆ្លៀតក្នុងឱកាសនេះផងដែរ លោកក៏សូមថ្លែងអំណរគុណដល់  លោក លោកស្រី ជាសប្បុរសជនទាំងអស់ ដែលបានជួយឧបត្ថម្ភគាំទ្រ ជាសម្ភារ: ថវិកា ដល់ក្រុមកីឡាករ កីឡាការិនី ធ្វើឱ្យការប្រកួតនេះមានដំណើរការល្អ ហើយនេះគឺជាការរួមចំណែកលើកស្ទួយដល់វិស័យកីឡា និងឱ្យយុវជនងាកមក លេងកីឡា នៅពេលទំនេរពីការសិក្សារៀនសូត្រផងដែរ៕