ខេត្តបាត់ដំបង៖   ថ្ងៃទី៤ ខែមេសា ឆ្នាំ២០២៥ នៅទីបញ្ជាការកងពលតូចថ្មើរជើងលេខ៥២ បានទទួលបដិសណ្ឋារកិច្ចស្វាគមន៍ ឯកឧត្តម អ៊ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្រ្តី ក្រសួងអភិវឌ្ឍន៍ជនបទ ដែលបានដឹកនាំប្រតិភូក្រសួងអភិវឌ្ឍន៍ជនបទ និងមន្ទីរអភិវឌ្ឍន៍ជនបទខេត្តទាំង៤ រួមមាន : ខេត្តបាត់ដំបង ខេត្តប៉ៃលិន ខេត្តបន្ទាយមានជ័យ និងខេត្តពោធិ៍សាត់ អញ្ជើញចុះសួរសុខទុក្ខ នាយទាហាន នាយទាហានរង និងពលទាហាន កងពលតូចថ្មើរជើងលេខ៥២ ក្នុងឱកាសបុណ្យចូលឆ្នាំប្រពៃណីជាតិខ្មែរ និងមានការអញ្ជើញចូលរួមពី មេបញ្ជាការរង យោធភូមិភាគទី៥ និងមេបញ្ជាការប្រចាំទិសទី៣ សំឡូតយោធភូមិភាគទី៥។
លោកឧត្តមសេនីយ៍ត្រី គុជ នាង មេបញ្ជាការកងពលតូចថ្មើរជើងលេខ៥២ បានសម្តែងនូវមនោសញ្ចេតនា រំភើបរីករាយឥតឧបមា និងសូមគោរពស្វាគមន៍យ៉ាងកក់ក្តៅជាទីបំផុត ចំពោះអង្គភាពសម្ព័ន្ធមេត្រីភាព ក្រសួងអភិវឌ្ឍន៍ជនបទ ដែលជានិច្ចកាល តែងតែយកចិត្តទុកដាក់ រួមសុខ រួមទុក្ខ គិតគូរពីសុខទុក្ខការលំបាករបស់កងកម្លាំងប្រដាប់អាវុធជាប់ជាប្រចាំ ព្រមទាំងបានចូលរួមចំណែកជួយឧបត្ថម្ភគាំទ្រយ៉ាងច្រើនដល់អង្គភាពយើងខ្ញុំទាំងស្មារតី សម្ភារ ថវិកា សម្រាប់កសាងអង្គភាព ក៏ដូចជាថវិកា ជូនដល់ដៃយោធិនផ្ទាល់ ដែលកត្តាទាំងអស់នេះ គឺពិតជាបានសបញ្ជាក់ឱ្យឃើញយ៉ាងច្បាស់ ពីការអាណិតស្រឡាញ់ ការយកចិត្តទុកដាក់ ការរួមសុខរួមទុក្ខ ការផ្សារភ្ជាប់គ្នាយ៉ាងជិតស្និទ្ធ រវាងសមរភូមិមុខ និងសមរភូមិក្រោយ រវាងមន្ត្រីរាជការស៊ីវិល ជាមួយកងកម្លាំងប្រដាប់អាវុធគ្រប់ប្រភេទ ស្របតាមគោលនយោបាយដឹកនាំដ៏ត្រឹមត្រូវឈ្លាសវៃប៉ិនប្រសប់ របស់រាជរដ្ឋាភិបាលកម្ពុជា ដែលមាន សម្តេចមហាបវរធិបតី ហ៊ុន ម៉ាណែត ជាប្រមុខដឹកនាំ។
ជាមួយគ្នានេះដែរ ឯកឧត្តម អ៊ិន ចន្ថា បានអញ្ជើញជាអធិបតីក្នុងការសម្ភោធដាក់ឱ្យប្រើប្រាស់អគារផ្ទះបាយមួយខ្នង ដែលជាអំណោយរបស់ក្រសួងអភិវឌ្ឍន៍ជនបទ នៅទីបញ្ចាការកងពលតូចថ្មើជើងលេខ៥២។
ក្នុងឱកាសអញ្ជើញចុះសួរសុខទុក្ខនេះផងដែរ ឯកឧត្តម អ៊ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ បាននាំយកនូវអំណោយដ៏ថ្លៃថ្លា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី រួមមាន៖ អង្ករ ចំនួន ៣.០០០គីឡូក្រាម មីជាតិ ចំនួន ១០០កេស ទឹកសុទ្ធ ចំនួន ៥០កេស ស្ករស ចំនួន ២០០គីឡូក្រាម ទឹកស៊ីអ៊ីវ ចំនួន ៥០យួរ ទឹកត្រី ចំនួន ៥០យួរ ប្រេងឆា ចំនួន ១៥០លីត្រ នំអន្សម ចំនួន ៥០០នំ និង ថវិកាចំនួន ២០.០០០.០០០ រៀលផងដែរ៕