ប៉េកាំង៖ យោធាចិនបាននិយាយនៅថ្ងៃអាទិត្យនេះថា ខ្លួនបានធ្វើការល្បាតជាប្រចាំ នៅក្នុងសមុទ្រចិនខាងត្បូង និងបានព្រមានហ្វីលីពីនកុំឲ្យមានការបង្កហេតុណាមួយ។

តាមការចេញផ្សាយដោយ រ៉យទ័រ នៅថ្ងៃទី១៤ កញ្ញានេះ បានឲ្យដឹងថា អ្នកនាំពាក្យនៃបញ្ជាការភាគខាងត្បូងរបស់យោធាចិនបាននិយាយថា ហ្វីលីពីនត្រូវតែបញ្ឈប់ជាបន្ទាន់នូវឧប្បត្តិហេតុបង្កហេតុ និងការកើនឡើងភាពតានតឹងនៅក្នុងសមុទ្រចិនខាងត្បូង។ 

ដោយនិយាយថា "យើងព្រមានយ៉ាងម៉ឺងម៉ាត់ដល់ភាគីហ្វីលីពីនឱ្យបញ្ឈប់ជាបន្ទាន់នូវឧប្បត្តិហេតុបង្កហេតុ និងការកើនឡើងភាពតានតឹងនៅក្នុងសមុទ្រចិនខាងត្បូង ក៏ដូចជាការនាំយកកម្លាំងខាងក្រៅសម្រាប់គាំទ្រដល់កិច្ចខិតខំប្រឹងប្រែងបែបនេះ ដែលត្រូវបានកំណត់ថាគ្មានប្រយោជន៍។" អ្នកនាំពាក្យខាងលើបន្តថា "រាល់ការប៉ុនប៉ងបង្កបញ្ហា ឬរំខានស្ថានការណ៍ នឹងមិនជោគជ័យឡើយ។"

ជុំវិញការព្រមានខាងលើ ក្រុមប្រឹក្សាដែនសមុទ្រ និងកងកម្លាំងប្រដាប់អាវុធរបស់ប្រទេសហ្វីលីពីន រួមទាំងស្ថានទូតហ្វីលីពីនប្រចាំនៅទីក្រុងប៉េកាំង មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។

គួរឲ្យដឹងថា ប្រទេសចិនបានទាមទារស្ទើរតែទាំងអស់នៃសមុទ្រចិនខាងត្បូង ដែលជាផ្លូវទឹកក្នុងការដឹកជញ្ជូនពាណិជ្ជកម្មប្រចាំឆ្នាំជាង ៣ ពាន់ពាន់លានដុល្លារ បើទោះបីជាមានការទាមទារនៃផ្នែកត្រួតស៊ីគ្នាដោយហ្វីលីពីន ព្រុយណេ ម៉ាឡេស៊ី និងវៀតណាម យ៉ាងណាក៏ដោយ៕