កណ្តាល៖ នារីវ័យក្មេងស្រស់ស្អាតម្នាក់ ត្រូវបានប្រជាពលរដ្ឋដេញចាប់ខ្លួនបាន រួចប្រគល់ឱ្យសមត្ថកិច្ច ក្រោយពីធ្វើសកម្មភាពលួចម៉ូតូ ០១ គ្រឿងបានសម្រេច និងបក្ខពួក២នាក់ទៀតបានរត់គេចខ្លួនបាត់ស្រមោល។

ហេតុការណ៍នៃអំពើលួចខាលើនេះ បានកើតហេតុឡើងនៅថ្ងៃទី១៦ ខែធ្នូ ឆ្នាំ២០២៤ វេលាម៉ោង ១២និង២០នាទី នៅចំណុចផ្លូវ ២១០ ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល។ 

ជនរងគ្រោះមានឈ្មោះ ជៅ សុខ ភេទប្រុស អាយុ ២០ឆ្នាំ ទីលំនៅភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល មុខរបរ និស្សិត។

ចំណែកជនសង្ស័យមានគ្នា ចំនួន ០៣នាក់ រួមមាន៖ ១- ឈ្មោះ គុយ សុលីកា ភេទស្រី អាយុ ២៣ឆ្នាំ ជនជាតិខ្មែរ ស្នាក់នៅផ្ទះជួលភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរ មិនពិតប្រាកដ(ឃាត់ខ្លួន) មានសារធាតុញៀនក្នុងទឹកនោម(+)។ 

២- ឈ្មោះ សីហា ភេទប្រុស អាយុ ៣០ឆ្នាំ ជនជាតិខ្មែរ ស្នាក់នៅផ្ទះជួលភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរ មិនពិតប្រាកដ (គេចខ្លួន) និងទី៣- មិនស្គាល់ឈ្មោះ ភេទប្រុសប្រហែលអាយុ ៣០ឆ្នាំ ជនជាតិខ្មែរ ស្នាក់នៅផ្ទះជួលភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្តាល, មុខរបរមិនពិតប្រាកដ (គេចខ្លួន)។

ចំពោះវត្ថុតាងចាប់យក មានម៉ូតូមួយគ្រឿង ម៉ាក Honda C125 ពណ៌ខ្មៅ សេរី២០១៧ ស្លាកលេខ ភ្នំពេញ ១GK-2000 ជារបស់ជនរងគ្រោះ។

សាក្សីបាននិយាយថា មុនពេលកើតហេតុជនរងគ្រោះបានជិះម៉ូតូ ០១គ្រឿង ចតទុកនៅខាងមុខហាងលក់កាម៉េរ៉ាសុវត្ថិភាពមួយកន្លែងស្ថិតតាមផ្លូវលេខ ២១០ ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ដោយភ្លេចដកកូនសោរម៉ូតូ។ 

លុះមកដល់វេលាកើតហេតុខាងលើ ក៏ស្រាប់តែមានជនសង្ស័យ ចំនួន ០៣ នាក់ (ប្រុស២នាក់ ស្រី១នាក់) ជិះម៉ូតូមួយគ្រឿងម៉ាក Honda ពណ៌ខ្មៅ មកឈប់នៅខាងមុខហាងហើយជនសង្ស័យម្នាក់ជាស្រីបានចុះទៅលួចម៉ូតូជនរងគ្រោះជិះចេញទៅបាត់ ប៉ុន្តែពេលនោះជនរងគ្រោះបានចេញមកទាន់ហើយស្រែកថា «ចោរៗ» ផ្អើលអស់ប្រជាពលរដ្ឋ ព្រមទាំងកម្លាំងនគរបាលក្រុងតាខ្មៅនិងប៉ុស្តិ៍តាខ្មៅបានជិះដេញតាមរហូតដល់ស្តុបផ្លូវ១១០ ក៏ឃាត់ខ្លួនបានជនសង្ស័យម្នាក់ជាស្រី្តចំនែកជនសង្ស័យ២នាក់ទៀតបានជិះរត់គេចខ្លួនបាត់ស្រមោល។

តាមការសាកសួរជនសង្ស័យ មានឈ្មោះ គុយ សុលីកាបានឆ្លើយថា «ខ្លួន និងបក្ខពួក ចំនួន ០២ នាក់ទៀត ពិតជាបាននាំគ្នាលួចម៉ូតូរបស់ជនរងគ្រោះប្រាកដមែន»។

បច្ចុប្បន្នជនសង្ស័យកំពុងឃាត់ខ្លួនជាបណ្តោះអាសន្ននៅអធិការដ្ឋាននគរបាលក្រុងតាខ្មៅ ដើម្បីកសាងសំណុំរឿងចាត់ការតាមនិតិវិធី៕