គុនខ្មែរ៖ ស្ថានីយទូរទស្សន៍ អិម អេស ជេ MSJ TV នឹងបើកទំព័រប្រវត្តិសាស្រ្តថ្មី សម្រាប់ដើមឆ្នាំ២០២៥ ជាមួយនឹងការប្រកួតកីឡាប្រដាល់គុនខ្មែរ ដែលបាននាំយកកីឡាករ ជើងខ្លាំង ចាស់ថ្មី ពោរពេញដោយសមត្ថភាព មកបញ្ចេញស្នៀតគុន ដើម្បីអង្រួនសង្វៀនប្រដាល់ឲ្យកាន់តែកក្រើកឡើង រយៈពេល៣ថ្ងៃ ចាប់ពីថ្ងៃទី២៤-២៥-២៦ ខែមករា ឆ្នាំ២០២៥ នេះ នៅលើដីឡូ៍ភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ ដោយក្រុមហ៊ុន វឌ្ឃនៈ ប្រ៊ូវើរី ដែលមានអ្នកឧកញ៉ា សំអាង វឌ្ឃនៈ ជាអគ្គនាយក សហការឧបត្ថម្ភគាំទ្រកម្មវិធី...។

លោកបណ្ឌិត ម៉េង សុភ័ណ្ឌ អគ្គនាយកស្ថានីយទូរទស្សន៍ អិម អេស ជេ MSJ TV និងជាទីប្រឹក្សាជាន់ខ្ពស់សហព័ន្ធកីឡាប្រដាល់គុនខ្មែរ បានអញ្ជើញកំពូលអ្នកប្រដាល់កម្រិតពិភពលោក គឺលោក ដេនីស ភើរិក (Denis  Puric) ជាភ្ញៀវកិត្តិយស ចូលរួមទស្សនាការប្រកួតកីឡាប្រដាល់គុនខ្មែរ ក្នុងមហាព្រឹត្តិការណ៍ គ្រុឌគុនខ្មែរមីនី ដើម្បីញ៉ាំងកម្មវិធីប្រដាល់គុនខ្មែរឲ្យកាន់តែមានភាពអធិកអធម  និង ដើម្បីបើកទំព័រប្រវត្តិសាស្រ្តថ្មី នៃមហាព្រឹត្តិការណ៍ គ្រុឌគុនខ្មែរមីនី សម្រាប់ដើមឆ្នាំ២០២៥ នេះ និងដើម្បីចែករំលែកអំពីវប្បធម៌ អរិយធម៌ នៃសិល្បៈក្បាច់គុនបុរាណខ្មែរ ដែលបានបន្សល់ទុកដោយដូនតាខ្មែរមានអាយុកាលរាប់ពាន់ឆ្នាំមកហើយនោះ បានផ្សព្វផ្សាយទៅកាន់ឆាកអន្តរជាតិផងដែរ។

គួរជម្រាបជូនថា កីឡាករ ដេនីស ភើរិក (Denis Puric) មានរហ័សនាម The Bosnian Menace សញ្ជាតិកាណាដា កូនកាត់ បូស្នៀ អេន ហឺហ្សេហ្គោវីណា (bosnnia and herzegovina )  បច្ចុប្បន្ន លោកមានវ័យ៤០ឆ្នាំ ហើយរូបលោកគឺជាកីឡាករប្រដាល់អាជីពម្នាក់ ដែលមានភាពល្បីល្បាញខ្លាំងលើសង្វៀន ONE Championship កម្រិតពិភពលោក។  លោក Denis  Puric មានកេរ្តិ៍ឈ្មោះបោះសំឡេងខ្លាំង តាមរយៈសមត្ថភាពប្រដាល់ដ៏អស្ចារ្យ ជាកំពូលកីឡាករប្រដាល់អាជីពមក្រិតពិភពលោក ដែលពិភពលោកទទួលស្គាល់រូបលោកផងដែរ។

ដូច្នេះ ដើម្បីជាការឆ្លើយតបតាមការអញ្ជើញរបស់លោកបណ្ឌិត ម៉េង សុភ័ណ្ឌ អគ្គនាយកស្ថានីយទូរទស្សន៍ អិម អេស ជេ MSJ TV ចូលរួមជាភ្ញៀវកិត្តិយសពិសេស (VIP), លោក Denis Puricនឹងអញ្ជើញមកទស្សនាការប្រកួតកីឡាប្រដាល់គុនខ្មែរ ក្នុងមហាព្រឹត្តិការណ៍ គ្រុឌគុនខ្មែរមីនី ដែលបានរៀបចំឡើងរយៈពេល៣ថ្ងៃ ចាប់ពីថ្ងៃទី២៤-២៥-២៦ ខែមករា ឆ្នាំ២០២៥ នេះ ដែលមានទីតាំងស្ថិតនៅលើដីឡូ៍ភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ ជាប់របងរោងចក្រសាប្រ៊ីណា ផ្លូវជាតិលេខ៤ ចាប់ពីវេលាម៉ោង៧យប់ តទៅ...៕