ភ្នំពេញ៖ មុខសញ្ញាជាចោរឆក់ទូរសព្ទ ចំនួន ០៣នាក់ ត្រូវបានកម្លាំងសមត្ថកិច្ចនាយកដ្ឋានព្រហ្មទណ្ឌអគ្គស្នងការនគរបាលជាតិ បង្ក្រាប និងឃាត់ខ្លួនជាបន្តបន្ទាប់បាន ចំនួន ០៣នាក់ យកមកសាកសួរ និងកសាងសំណុំរឿងបញ្ជូនទៅកាន់តុលាការ។

ដោយមានការចង្អុលបង្ហាញបញ្ជាដឹកនាំដោយ ឧត្តមសេនីយ៍ឯក ង៉េង ជួ ប្រធាននាយកដ្ឋាន​នគរបាលព្រហ្មទណ្ឌ លោកឧត្តមសេនីយ៍ត្រី​ ប៊ុត​ វណ្ណារដ្ឋ​ អនុប្រធាននាយកដ្ឋានទទួលផែន​ បានដឹកនាំកម្លាំងជំនាញនាយកដ្ឋានស្រាវជ្រាវ ស៊ើបអង្កេតឈានដល់ការបង្ក្រាប និងបានការធ្វើការឃាត់ខ្លួនជនសង្ស័យ​ទាំង៣នាក់ ជាមុខសញ្ញាឆោរឆក់យ៉ាងសកម្ម។

នគរបាលបានឱ្យដឹងថា នៅថ្ងៃទី០៨ ខែធ្នូ ឆ្នាំ២០២៤ វេលាម៉ោង ​០៩និង០៥នាទី​ កម្លាំងនាយកដ្ឋាននគរបាលព្រហ្មទណ្ឌ បានចាប់ខ្លួនជនសង្ស័យ ចំនួន ០២នាក់​ នៅចំណុចបន្ទប់ជួល​គ្មានលេខ ផ្លូវព្រះសុរាម្រិត​ ភូមិ០៣​ ក្នុងសង្កាត់ចតុមុខ​ ខណ្ឌដូនពេញ​ រាជធានីភ្នំពេញ ​រួមមាន ទី១៖ ឈ្មោះ​ ស៊ីម​ ស្រស់​ ភេទប្រុស អាយុ ២៩ឆ្នាំ ជនជាតិខ្មែរ មុខរបរ សន្តិសុខ ទីកន្លែងស្នាក់នៅផ្ទះលេខ ២៣ ផ្លូវD ក្នុងសង្កាត់ព្រែកកំពឹស ខណ្ឌដង្កោ រាជធានីភ្នំពេញ (ជាម្ចាស់ម៉ូតូ) និង ទី២៖ ឈ្មោះ​ សៅ​ បូរិន​ ភេទប្រុស អាយុ ២៧ឆ្នាំ ជនជាតិខ្មែរ មុខរបរ មិនពិតប្រាកដ ទីកន្លែងស្នាក់នៅផ្ទះជួល​មិនចាំលេខ ផ្លូវ២៦៨ ក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ (ជាជនដៃដល់)។ 

នគរបាលបានឱ្យដឹងទៀតថា នៅថ្ងៃទី០៥ ខែធ្នូ​ ឆ្នាំ២០២៤​ វេលាម៉ោង ១២និង៣០នាទី​ បានធ្វើសកម្មភាពឆក់ទូរសព្ទដៃពីបុរសរងគ្រោះ ជាជនជាតិចិន កំពុងដើរបានសម្រេច​ នៅចំណុច ផ្លូវ២៤០​ ក្នុងសង្កាត់ជ័យជំនះ​ ខណ្ឌដូនពេញ។ រួចកម្លាំងជំនាញបន្តឃាត់ខ្លួនជនសង្ស័យបាន ០១នាក់ទៀត នៅចំណុចដដែលខាងលើនៅវេលាម៉ោង ១០និង៤៦នាទី​ ឈ្មោះ​ ចំរើន​ ដែន​ អាយុ ២៨ឆ្នាំ​ ជនជាតិខ្មែរ​ មុខរបរ ចុងភៅ​ ទីកន្លែងស្នាក់នៅបន្ទប់ជួលមិនមានលេខ​ ផ្លូវលំ​ ក្នុងសង្កាត់ចាក់អង្រែលើ​ ខណ្ឌមានជ័យ​ ដែលបានធ្វើសកម្មភាព ជាមួយឈ្មោះ​ សៅ​ បូរិន នៅថ្ងៃទី០៧​ ខែធ្នូ​ ឆ្នាំ២០២៤​ នៅវេលាម៉ោង ១១និង៣០នាទី​ បានឆក់ទូរសព្ទដៃពីនារីរងគ្រោះជាជនជាតិអាមេរិច កំពុងឈរបានសម្រេច​ នៅចំណុច ផ្លូវលេខ២១ ក្នុងសង្កាត់ទន្លេបាសាក់​ ខណ្ឌចំការមន ជាអ្នកបើក។

បច្ចុប្បន្ន​កម្លាំងជំនាញបាននាំជនសង្ស័យខាងលើមកនាយកដ្ឋាននគរបាលព្រហ្មទណ្ឌ​ ដើម្បីធ្វើការសាកសួរ​តាមនីតិវិធី និងកសាងសំណុំរឿងចាត់ការតាមផ្លូវច្បាប់៕