គុនខ្មែរ៖ ក្រោមការរៀបចំដោយស្ថានីយទូរទស្សន៍ MSJ TV  និងមានការសហការឧបត្ថម្ភគាំទ្រដោយ ក្រុមហ៊ុនវឌ្ឍនៈប៊្រូវើរី ដែលមានអ្នកឧកញ៉ា សំអាង វឌ្ឍនៈ ជាអគ្គនាយកក្រុមហ៊ុន លើកនេះបាននាំយក ក្រុមអ្នក ចម្បាំង គុនខ្មែរ ចំនួន៣រូប ហោះឆ្លងដែនទៅសាកល្បងក្បាច់គុនជាមួយម្ចាស់ផ្ទះម៉ាឡេស៊ី ហ្វឹកហាត់ ក្បាច់គុនមួយថៃ ដើម្បីដណ្ដើមខ្សែក្រវាត់រេនថេបណៃឆេមពាន (RENTAB NIGHT CHAMPION ) ដ៏ល្បីប្រចាំសង្វៀនប្រដាល់ប្រទេសម៉ាឡេស៊ី នាទីក្រុងកូឡាឡាំពួ ប្រទេសម៉ាឡេស៊ី នៅថ្ងៃទី២៩ ខែធ្នូ ឆ្នាំ២០២៤ ខាងមុខនេះ។ ដែលលើកនេះជាពេលវេលាដែលហ្វេនៗគាំទ្រគុនខ្មែរ កំពុងទន្ទឹងរង់ចាំមើលយ៉ាងអន្ទះសាថា តើអ្នកចម្បាំងគុនខ្មែរប៉ះជាមួយនឹងគុនថៃ នរណានឹងក្លាយ ជាម្ចាស់ខ្សែក្រវាត់..?

សូមបញ្ជាក់ថាក្រោមការយកចិត្តទុកដាក់ខ្ពស់និងមានការគិតគូយ៉ាងល្អិតល្អន់របស់លោកបណ្ឌិត ម៉េង សុភ័ណ្ឌ អគ្គនាយកស្ថានីយទូរទសន៍ MSJ TV និងជាទីប្រឹក្សាជាន់ ខ្ពស់ សហព័ន្ធកីឡាប្រដាល់ គុន ខ្មែរ បាន រុញច្រានវិស័យកីឡាប្រដាល់គុនខ្មែរឲ្យកាន់តែមានភាពល្បីល្បាញ ទាំងក្នុងនិងក្រៅប្រទេស ជាពិសេសដើម្បីឲ្យពិភពលោកបានឃើញ បានស្គាល់ និងបានភ្លក់រសជាតិអំពីក្បាច់គុនបុរាណខ្មែរ ដែលបុព្វបុរសខ្មែរ បានបន្សល់ទុក មានអាយុកាលរាប់ពាន់ឆ្នាំមកហើយនោះ ឲ្យមានភាពល្បីល្បាញ នៅលើឆាកអន្តរជាតិ។ ជាក់ស្ដែងលើកនេះលោកបណ្ឌិត ម៉េង សុភ័ណ្ឌ បានចម្រាញ់ យកកីឡាករ គុនខ្មែរ ដែលពោរពេញទៅដោយទេពកោសល្យ និងមានសមត្ថភាព ដើម្បីឡើង ទៅ តតាំងជាមួយ នឹងម្ចាស់ផ្ទះម៉ាឡេស៊ី ដណ្ដើមយកខ្សែក្រវាត់ចំនួន៣ខ្សែ មកកាន់មាតុប្រទេសវិញ។ ចាំមើលថា តើក្រុមអ្នកចម្បាំងគុនខ្មែរទាំង៣រូប ដែលទទួលបានឪកាសមាសនេះ ពួកគេអាចធ្វើ បានល្អដល់ កម្រិតណា? តើពួកគេអាចដណ្ដើមយកខ្សែក្រវាត់ទាំងនោះ មកកាន់ប្រទេសដើម កំណើតខ្លួន វិញបានដែរ ឬទេ..?

គួរជម្រាបជូនផងដែរថា ក្រុមអត្តពលិកគុនខ្មែរទាំង៣រូប ដែលនឹងត្រូវហោះឆ្លងដែនទៅកាន់ប្រទេស ម៉ាឡេស៊ី រួមមាន៖

-កីឡាករគុនខ្មែរ ដែលមានរហ័សនាមអ្នកលេងជង្គង់ហោះ ប៉ុង ពិសិដ្ឋ ( Pong Pisith ) ត្រូវជួបតតាំងគ្នាជាមួយកីឡាករ  ធីណាហារ៉េន ( Thinaharan ) ម្ចាស់ផ្ទះម៉ាឡេស៊ី

ប្រកួតក្នុងប្រភេទទម្ងន់៦០គីឡូក្រាម កាត់សេចក្ដីឈ្នះចាញ់៣ទឹក ដណ្ដើមយកខ្សែក្រវាត់ រេនថេបណៃឆេមពាន (RENTAB NIGHT CHAMPION ) ចំនួន១ខ្សែ ។

-កីឡាករគុនខ្មែរ ដែលមានរហ័សនាមក្រមុំតែងខ្លួន អ៊ុំ ចំរើន  ( Um Chomreun ) ត្រូវជួបប្រកួតជាមួយនឹងខ្លាកំណាចឆ្លងដែនមកពីប្រទេសអ៊ីរ៉ង់ កីឡាករ  ហ្សាហ៊ូ ហ្ស៊ីហ្សារៀន ( Shahoo Gheisarian ) ក្នុងប្រភេទទម្ងន់៧០គីឡូក្រាម កាត់សេចក្ដីឈ្នះចាញ់៣ទឹក ដណ្ដើមយកខ្សែក្រវាត់រេនថេបណៃឆេមពាន (RENTAB NIGHT CHAMPION ) ចំនួន១ខ្សែ ។

-កីឡាករគុនខ្មែរវ័យក្មេងកែងទាលោហិត ប៉ុង ប៊ុនឆេង ( Pong Bunchheng ) ត្រូវជួប ប្រកួតជាមួយនឹងកីឡាករ  ហ្វារីដ ស៊ៀដា  ( Farid Seuxda ) ក្នុងប្រភេទទម្ងន់៥៨គីឡូក្រាម កាត់សេចក្ដីឈ្នះចាញ់៣ទឹក ដណ្ដើមយកខ្សែក្រវាត់រេនថេបណៃឆេមពាន (RENTAB NIGHT CHAMPION ) ចំនួន១ខ្សែ ។

កុំភ្លេចរង់ចាំទស្សនាការផ្សាយផ្ទាល់ការប្រកួតដណ្ដើមខ្សែក្រវាត់រេនថេបណៃឆេមពាន (RENTAB NIGHT CHAMPION ) របស់ក្រុមអ្នកចម្បាំងគុនខ្មែរទាំង៣រូប ខាងលើចេញពីសង្វៀន រេនថេបណៃ (RENTAB NIGHT) ដែលជាសង្វៀនប្រដាល់ដ៏ល្បីឈ្មោះ ក្នុងទីក្រុងកូឡាឡាំពួ ប្រទេសម៉ាឡេស៊ី នៅថ្ងៃទី២៩ ខែធ្នូ ឆ្នាំ២០២៤ នៅលើកញ្ចក់ទូរទស្សន៍ អឹម អេស ជេ ( MSJ TV ),  Facebook page: MSJ TV KUN KHMER, MSJ TV  និងMSJ TV Sports ចាប់ពីវេលាម៉ោង 08:30 pm ( ម៉ោងក្នុងប្រទេសម៉ាឡេស៊ី ) ត្រូវនិងម៉ោង 07:30pm ម៉ោងនៅ ប្រទេសកម្ពុជា តទៅ៕