
សៀមរាប៖ អាជ្ញាធរជាតិអប្សរា បានឱ្យដឹងថា ក្នុងរយៈកាលថ្មីៗនេះ ចំនួនសត្វស្វានៅក្នុងតំបន់រមណីយដ្ឋានអង្គរ មានការកើនឡើងគួរឱ្យកត់សម្គាល់។ បច្ចុប្បន្ន តាមរយៈការផ្តល់ចំណីជាប្រចាំរបស់ក្រុមបុគ្គលមួយចំនួនតូច ក្នុងគោលបំណងផលិតមាតិកាជាប្រយោជន៍ផ្ទាល់ខ្លួន បានផ្លាស់ប្តូរនូវទម្លាប់រស់នៅបែបធម្មជាតិរបស់សត្វស្វា ពីសត្វព្រៃ ទៅជាសត្វស្រុក ដែលមានចរិតកាច ចេះដណ្តើមចំណី និងឈានរហូតដល់ការបង្កជារបួសស្នាមទៅលើមនុស្សជាដើម។ ដូច្នេះសូមសាធារណជនឿភ្ញៀវទេសចរជាតិ និងអន្តរជាតិទាំងអស់ មានការប្រុងប្រយ័ត្នចំពោះសត្វស្វាទាំងនោះ។
នៅអង្គារ៍ ថ្ងៃទី០៤ ខែកុម្ភៈ ឆ្នាំ២០២៥នេះ អាជ្ញាធរជាតិអប្សរា ដែលចេញក្តីជូនដំណឹង ដោយបានបញ្ជាក់ថា៖ ក្នុងគោលដៅ ដើម្បីស្វែងរកដំណោះស្រាយពាក់ព័ន្ធនឹងករណីខាងលើនេះ អាជ្ញាធរជាតិអប្សរា ក្រោមកិច្ចសហការជិតស្និទ្ធជាមួយស្ថាប័នជំនាញនានារបស់ ក្រសួងកសិកម្ម រុក្ខាប្រមាញ់ និងនេសាទ ដូចជា រដ្ឋបាលព្រៃឈើ និងមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប ជាដើម បានប្រជុំពិភាក្សាគ្នាជា បន្តបន្ទាប់ឈានទៅរកការអនុវត្តវិធានការចាំបាច់នានា នាពេលខាងមុខ។ មួយវិញទៀត នាពេលកន្លងមក ទាំងអាជ្ញាធរជាតិអប្សរា និងស្ថាប័នជំនាញខាងលើ បានចេញជាសេចក្តីប្រកាសព័ត៌មាន អំពីបញ្ហានេះ អមដោយការអំពាវនាវជាសាធារណៈ ស្នើសាធារណជនទាំងអស់ មេត្តានៅឱ្យឆ្ងាយពីសត្វស្វា បញ្ឈប់ការផ្តល់ចំណី ចៀសវាងប៉ះពាល់ ឬលេងជាមួយសត្វស្វា ជាដើម។ល។
ជាថ្មីម្តងទៀត អាជ្ញាធរជាតិអប្សរា បានស្នើដល់សាធារណជន ភ្ញៀវទេសចរជាតិ-អន្តរជាតិ មគ្គុទ្ទេសក៍ ទេសចរណ៍ និងប្រតិបត្តិករវិស័យទេសចរណ៍ក្នុងខេត្តសៀមរាបទាំងអស់ មេត្តាជួយផ្សព្វផ្សាយនូវខ្លឹមសារនេះ ក៏ដូចជាណែនាំ និងបញ្ឈប់នូវសកម្មភាពណាមួយដែលអាចនាំមកនូវបញ្ហាបង្កឡើងដោយសត្វស្វាជាយថាហេតុ។
តាមរបាយការណ៍ បានបញ្ជាក់ថា បច្ចុប្បន្នសត្វស្វា ដែលកំពុងរស់នៅ និងបន្តពូជនៅក្នុងតំបន់អង្គរ បានបង្កផលប៉ះពាល់យ៉ាងខ្លាំងដល់ប្រាសាទ និងភ្ញៀវទេសចរ ដូចជា ទាញថ្មប្រាសាទឲ្យធ្លាក់ បំផ្លាញសម្ភារបរិក្ខារក្នុងប្រាសាទឲ្យបែកបាក់ ខាំ ឬ ដណ្តើមសម្ភារ និងចំណីអាហារពីភ្ញៀវទេសចរ និងបង្កការភ័យខ្លាចដល់ការទស្សនារបស់ភ្ញៀវទេសចរផងដែរ។ ក្នុងទីតាំងសត្វស្វា ដែលកំពុងរស់នៅទាំងនេះ ក្នុងនោះមានទីតាំង ប្រាសាទអង្គរវត្ត និងបរិវេណអតីតរាជធានីអង្គរធំ តែងមានសត្វស្វាបង្កផលប៉ះពាល់ដល់ប្រាសាទ និងភ្ញៀវទេសចរច្រើនជាងគេ។
ជាមួយគ្នានេះ អាជ្ញាធរជាតិអប្សរា នឹងបន្តកិច្ចសហការជាមួយផ្នែកជំនាញពាក់ព័ន្ធនៃក្រសួងកសិកម្ម រុក្ខាប្រមាញ់ និងនេសាទ ដើម្បីស្វែងរកដំណោះស្រាយសមរម្យ ក្នុងការបញ្ចៀសនូវបញ្ហាផ្សេងៗក្នុងឧទ្យានអង្គរ ដែលបង្កឡើងដោយសត្វស្វា៕
