មេដឹកនាំគណបក្ស Bhumjaithai លោក Anutin Charnvirakul បានប្រកាសបេក្ខភាព «នាយករដ្ឋមន្ត្រី» របស់លោកនៅក្នុងសន្និសីទសារព័ត៌មាន កាលពីយប់ថ្ងៃសុក្រ ទី២៩ ខែសីហានេះ ជាមួយសម្ព័ន្ធមិត្តមកពីគណបក្សផ្សេងទៀត។ 

លោក Anutin ក៏ទទួលបានការគាំទ្រពីសមាជិកសភាភឿថៃ ចំនួន ១០ រូប ដែលដឹកនាំដោយ លោក Sakda Wichiansin មកពីខេត្ត Kanchanaburi បើទោះបីជាភឿថៃ ជាគណបក្សសំខាន់របស់រដ្ឋាភិបាលចាំផ្ទះបច្ចុប្បន្នក៏ដោយ។

លោក Anutin បាននិយាយថា «លោកបានត្រៀមខ្លួនរួចជាស្រេច ដើម្បីក្លាយជានាយករដ្ឋមន្ត្រីទី៣២ របស់ប្រទេសថៃ បន្ទាប់ពី Paetongtarn Shinawatra ត្រូវបានដកចេញដោយតុលាការធម្មនុញ្ញ»។ 

លោកអះអាងទៀតថា «បានត្រៀមខ្លួនសម្រាប់តួនាទីជានាយករដ្ឋមន្ត្រីនេះ តាំងពីឆ្នាំ២០១៩ ហើយជឿជាក់ថា ឥឡូវនេះ លោកមានការគាំទ្រគ្រប់គ្រាន់ពីសភា ដើម្បីបង្កើតរដ្ឋាភិបាលបណ្តោះអាសន្ន។ បន្ទាប់ពីយល់ព្រមតាមលក្ខខណ្ឌដែលកំណត់ដោយគណបក្សប្រជាជន លោកកំពុងស្នើសុំរយៈពេល៤ខែ ដើម្បីផ្តោតលើការអភិវឌ្ឍន៍ជាតិ»

សូមជម្រាបថា នៅយប់ថ្ងៃសុក្រនេះដែរ លេខាធិការដ្ឋាននៃសភាតំណាងរាស្ត្រ បានចេញសេចក្តីជូនដំណឹងដល់សមាជិកសភា ដែលប្រកាសអំពីសម័យប្រជុំពិសេសនៅថ្ងៃទី០៣ និងទី០៥ ខែកញ្ញា ឆ្នាំ២០២៥ ខាងមុខនេះ។

លោកអនុសេនីយ៍ឯក Arpath Sukhanunth អគ្គលេខាធិការស្តីទី បានលើកឡើងថា «ថ្ងៃបន្ថែមត្រូវបានបម្រុងទុក ក្នុងករណីដែលភាគីទាំងពីរឈានដល់កិច្ចព្រមព្រៀងមួយ ដើម្បីរៀបចំការបោះឆ្នោតជ្រើសរើសនាយករដ្ឋមន្ត្រីថ្មី។ បើដូច្នេះមែនបញ្ហានេះនឹងត្រូវបញ្ជូនបន្តទៅលេខាធិការដ្ឋានហើយបន្ថែមទៅក្នុងរបៀបវារៈជាករណីពិសេស»៕