បាងកក៖ ក្រោយតំណែងនាយករដ្ឋមន្ត្រីទើបតែបានបញ្ចប់មិនដល់មួយថ្ងៃផង មេដឹកនាំគណបក្សភឿថៃមានទំនុកចិត្តយ៉ាងមុតមាំថា គណបក្សពួកគេអាចប្រមូលសំឡេងគ្រប់គ្រាន់ដើម្បីបង្កើតរដ្ឋាភិបាលបាន។

លោក Prasert Jantararauangtong ឧបនាយករដ្ឋមន្ត្រីស្តីទី និងជារដ្ឋមន្ត្រីក្រសួងសេដ្ឋកិច្ច និងសង្គមឌីជីថល បានបង្ហើបថា គណបក្សភឿថៃ កំពុងដំណើរការប្រមូលសន្លឹកឆ្នោតដើម្បីបង្កើតរដ្ឋាភិបាល។ លោកមានទំនុកចិត្តថា គណបក្សនេះនឹងមានការគាំទ្រគ្រប់គ្រាន់ ហើយនឹងរក្សាដៃគូចម្រុះដូចដែលបានប្រកាសកាលពីម្សិលមិញ (២៩ សីហា ២០២៥)។ 

លោក Prasert បានរំឭកប្រជាជនថៃថា កុំឲ្យសន្និដ្ឋានផ្ដេសផ្ដាសទាក់ទងនឹងការអះអាងរបស់គណបក្ស Bhumjaithai ដែលមានសំឡេងលើសចំនួន ២៨០ សំឡេងព្រោះទាំងគណបក្ស Prachachon និងគណបក្ស Kla Tham មិនបានទទួលយកសំណើនេះជាផ្លូវការទេ។

តាមការចេញផ្សាយពីសារព័ត៌មានថៃ Khaosod បានឲ្យដឹងថា លោក Prasert បានបញ្ជាក់ថា វត្តមានរបស់ដៃគូចម្រុះមួយចំនួននៅឯការជួបជុំរបស់គណបក្ស Bhumjaithai មិនមានន័យថា ពួកគេមានសំឡេងគ្រប់គ្រាន់ដើម្បីបង្កើតរដ្ឋាភិបាលបាននោះទេ។ លោកបានបន្ថែមថា គណបក្សភឿថៃ នឹងបើកចំហក្នុងការអញ្ជើញគណបក្ស Prachachon ឱ្យចូលរួមក្នុងរដ្ឋាភិបាលរបស់ពួកគេ ហើយពួកគេ ត្រូវប្រមូលសំឡេងឲ្យបានគ្រប់គ្រាន់ដើម្បីបង្កើតរដ្ឋាភិបាល ដែលស្របតាមគោលការណ៍ប្រជាធិបតេយ្យនិងរដ្ឋធម្មនុញ្ញ៕