ប្រធានក្រុមប្រឹក្សានយោបាយជាន់ខ្ពស់ Houthi បាននិយាយកាលពីថ្ងៃសៅរ៍ថា នាយករដ្ឋមន្ត្រីនៃរដ្ឋាភិបាលដែលគ្រប់គ្រងដោយក្រុម Houthi ប្រទេសយេម៉ែន និងរដ្ឋមន្ត្រីជាច្រើននាក់ផ្សេងទៀតត្រូវបានសម្លាប់ ក្នុងការវាយប្រហាររបស់អ៊ីស្រាអែលទៅលើរដ្ឋធានី Sanaa ។ នេះបើតាមការចេញផ្សាយពីភ្នាក់ងារសារព័ត៌មាន រ៉យទ័រ នៅថ្ងៃទី៣១ សីហា ឆ្នាំ២០២៥។

អ៊ីស្រាអែលបាននិយាយកាលពីថ្ងៃសុក្រថា ការវាយប្រហារតាមអាកាសបានកំណត់គោលដៅទៅលើប្រធាន រដ្ឋមន្ត្រីការពារជាតិ និងមន្ត្រីជាន់ខ្ពស់ផ្សេងទៀតរបស់ក្រុមដែលតម្រង់ទិសអ៊ីរ៉ង់។ 

យោងតាមសេចក្តីថ្លែងការណ៍របស់ លោក Mashat ប្រធានក្រុមប្រឹក្សានយោបាយជាន់ខ្ពស់ Houthi ជុំវិញការវាយប្រហាររបស់អ៊ីស្រាអែល កាលពីថ្ងៃព្រហស្បតិ៍កន្លងទៅ មិនបានបញ្ជាក់ច្បាស់ថា តើរដ្ឋមន្ត្រីការពារជាតិ Houthi ស្ថិតក្នុងចំណោមអ្នកស្លាប់ឬអត់នោះទេ។

គួរបញ្ជាក់ឲ្យដឹងថា លោក Ahmad Ghaleb al-Rahwi ត្រូវបានតែងតាំងជានាយករដ្ឋមន្ត្រី Houthi កាលពីមួយឆ្នាំមុន ប៉ុន្តែមេដឹកនាំជាក់ស្តែងនៃរដ្ឋាភិបាលហូធី មិនមែនជាលោកទេ តែជាអនុប្រធានរបស់គាត់គឺ លោក Mohammed Miftah ដែលត្រូវបានចាត់តាំងកាលពីថ្ងៃសៅរ៍ដើម្បីបំពេញភារកិច្ចជានាយករដ្ឋមន្ត្រីវិញ។

លោក Mohammed Miftah គឺជាសម្ព័ន្ធមិត្តរបស់អតីតប្រធានាធិបតីយេម៉ែន លោក Ali Abdullah Saleh ដែលក្រុម Houthis បានបណ្តេញចេញពីទីក្រុង Sanaa នៅចុងឆ្នាំ ២០១៤ កន្លងទៅ ដែលបង្កឱ្យមានសង្រ្គាមស៊ីវិលរយៈពេលមួយទសវត្សរ៍។ 

គួរឲ្យដឹងថា ប្រទេសយេម៉ែន ត្រូវបានបំបែកជាពីររវាងរដ្ឋបាលក្រុម Houthi ក្នុងទីក្រុង Sanaa និងរដ្ឋាភិបាលដែលគាំទ្រដោយអារ៉ាប៊ីសាអូឌីតនៅទីក្រុង Aden៕