ភ្នំពេញ៖ ព្រះករុណាព្រះបាទសម្តេចព្រះបរមនាថ នរោត្តម សីហមុនី បានត្រាស់បង្គាប់តែងតាំង និងផ្តល់ឋានៈជូនវីរសិល្បករជើងចាស់ផ្នែកចម្រៀងប្រពៃណីបុរាណ និងចម្រៀងអាយ៉ៃ លោក ព្រហ្ម ម៉ាញ ជាទីប្រឹក្សាសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នីតិកាលទី៥ មានឋានៈស្មើ «រដ្ឋលេខាធិការ»។ នេះបើយោងតាមព្រះរាជក្រឹត្យរបស់ព្រះមហាក្សត្រដែលបណ្តាញសារព័ត៌មាន អឹម អេស ជេ ទទួលបាននៅថ្ងៃទី០៩ ខែកញ្ញា ឆ្នាំ២០២៥នេះ។

លោក ព្រហ្ម ម៉ាញ ដែលជាសិល្បករជើងចាស់ផ្នែកបុរាណ បច្ចុប្បន្នមានវ័យជាង ៧០ឆ្នាំផ្លាយ ដែលមានស្រុកកំណើតក្នុងខេត្តកំពង់ស្ពឺ ធ្លាប់ទទួលងារ ជា «វីរសិល្បករ» ផ្នែកអាយ៉ៃ កាលពីឆ្នាំ២០០៨។ បន្ទាប់មកទទួលបានគោរមងារកិត្តិយសនៃរាជបណ្ឌិត្យសភាកម្ពុជា គឺគោរមងារ ជា «កិត្តិឧទ្ទេសបណ្ឌិត» នៅថ្ងៃទី០៩ ខែមេសា ឆ្នាំ ២០២២ និងក្នុងឆ្នាំ២០២៥នេះ ត្រូវបានព្រះមហាក្សត្រត្រាស់បង្គាប់តែងតាំងជាទីប្រឹក្សាសម្តេចតេជោ ហ៊ុន សែន ប្រធានព្រឹទ្ធសភា មានឋានៈស្មើ «រដ្ឋលេខាធិការ» បន្ថែមទៀត។ ក្រៅពីអាជីពជាសិល្បករផ្នែកបុរាណ និងចម្លៀងអាយ៉ៃ លោក ព្រហ្ម ម៉ាញ ក៏មានក្រមខ័ណ្ឌក្នុងជួរកងទ័ពមានឋានន្តរស័ក្តិថ្នាក់វរសេនីយ៍ឯក (ស័ក្តិ៥) នៅបញ្ជាការដ្ឋានកងអង្គរក្សផងដែរ។

ចំពោះមហាជនទូទៅទទួលស្គាល់ថាវរសិល្បករជើងចាស់ លោក ព្រហ្ម ម៉ាញ មានដៃគូចម្រៀងអាយ៉ៃឆ្លើយឆ្លងដ៏ប៉ិនប្រសបផ្ទុះសំណើចមិនចេះរីងស្ងួត គឺអ្នកស្រី នួន សារី ហៅ «យាយ យ៉យ» តែម្តង។ តាមជីវប្រវត្តិខ្លះៗ បានបង្ហាញថា លោក ព្រហ្ម ម៉ាញ បានចាប់ផ្តើមចូលប្រឡូកវិស័យសិល្បៈផ្នែកបុរាណ តាំងពីកំឡុងឆ្នាំ១៩៧០ មកម្ល៉េះ គិតរហូតដល់បច្ចុប្បន្ននេះ គឺមានរយៈពេលប្រមាណជាង ៥០ឆ្នាំ មានកេរ្តិ៍ឈ្មោះបោះសំឡេងទាំងក្នុង និងក្រៅប្រទេសមិនថាក្នុងស្រទាបយុវវ័យ និងយុវចាស់នោះទេ គឺទស្សនា និងស្តាប់មិនចេះជិនណាយនូវភាពក្រម៉ិច្រម៉ើមប៉ិនប្រសប់ ជាពិសេសពូកែក្នុងការប្រើប្រាស់នូវសំនួនវោហារស័ព្ទ ឃ្លោងឃ្លា ពាក្យពេចន៍ខ្មែរណែងណងដ៏ពីរោះរណ្តំ និងបែបបង្កប់ន័យផងដែរ៕