កាលពីពេលថ្មីៗនេះ TikTok បានបង្ហាញនូវរបាយការណ៍មួយថា ប្រទេសចិនកំពុងតែធ្វើការពិចារណាក្នុងការអនុញ្ញាត ឱ្យមានការលក់ប្រតិបត្តិការរបស់ក្រុមហ៊ុនប្រព័ន្ធផ្សព្វផ្សាយសង្គមរបស់សហរដ្ឋអាមេរិកទៅឱ្យ Elon Musk ថាជាការ "ប្រឌិតសុទ្ធសាធ"។
តាមរយៈការអត្ថាធិប្បាយរបស់ក្រុមហ៊ុននេះ បានធ្វើឡើងក្នុងការឆ្លើយតបទៅនឹងរបាយការណ៍របស់ Bloomberg ថាមន្ត្រីចិនកំពុងតែថ្លឹងថ្លែងនូវជម្រើសមួយដែលអាចឃើញអាជីវកម្មរបស់ខ្លួននៅអាមេរិកត្រូវបានលក់ទៅឱ្យអ្នកមានបំផុតរបស់ពិភពលោ ប្រសិនបើតុលាការកំពូលរបស់សហរដ្ឋអាមេរិកលើកពេលបម្រាមលើកម្មវិធីនោះ។
ចំពោះបញ្ហានេះ យុត្តិធម៌របស់តុលាការកំពូលគឺត្រូវសម្រេចលើច្បាប់ដែលកំណត់នូវថ្ងៃផុតកំណត់ត្រឹមថ្ងៃទី ១៩ ខែមករា សម្រាប់ TikTok ដើម្បីលក់ប្រតិបត្តិការនៅសហរដ្ឋអាមេរិក ឬប្រឈមមុខនឹងការហាមឃាត់នៅក្នុងប្រទេសខ្លួនជាកំហិត។
TikTok បាននិយាយម្តងហើយម្តងទៀតថា ខ្លួននឹងមិនលក់ប្រតិបត្តិការនៅសហរដ្ឋអាមេរិកនោះទេ។
បន្ថែមពីនេះ អ្នកនាំពាក្យ TikTok ក៏បានបានប្រាប់ BBC News ដែរថា "យើងមិនអាចត្រូវបានគេរំពឹងថានឹងធ្វើអត្ថាធិប្បាយលើរឿងប្រឌិតសុទ្ធសាធទាំងនោះទេ" ។
បើយោងទៅតាម ទីភ្នាក់ងារព័ត៌មាន Bloomberg បានរាយការណ៍ដោយលើកឡើងពីមនុស្សដែលដឹងពីបញ្ហានេះថា សេណារីយ៉ូដែលអាចធ្វើទៅបានដែលត្រូវពិចារណាដោយមន្ត្រីចិននឹងឃើញវេទិកាប្រព័ន្ធផ្សព្វផ្សាយសង្គម X របស់ Musk គ្រប់គ្រងប្រតិបត្តិការរបស់ TikTok នៅសហរដ្ឋអាមេរិក។
ស្របគ្នានេះដែរ X មិនបានធ្វើការឆ្លើយតបភ្លាមៗ នោះទេចំពោះសំណើរបស់ BBC ដើម្បីសុំការអត្ថាធិប្បាយ។
គួរបញ្ជាក់ថា Elon Musk គឺជាសម្ព័ន្ធមិត្តជិតស្និទ្ធរបស់ប្រធានាធិបតីជាប់ឆ្នោតអាមេរិក Donald Trump ដែលគ្រោងនឹងត្រលប់មកសេតវិមានវិញនៅថ្ងៃទី ២០ ខែមករា នេះហើយ។
ហើយទាក់ទងជាមួយនឹងរឿងក្ដីដែលអាមេរិក គ្រោងនឹងបិទ TikTok នេះ កាលពីខែមុន លោក Trump បានជំរុញឲ្យតុលាការកំពូលពន្យារពេលការសម្រេចចិត្តរបស់ខ្លួនរហូតដល់លោកចូលកាន់តំណែងដើម្បីអាចឲ្យលោកស្វែងរក "ដំណោះស្រាយនយោបាយ" បាន។
ដោយមេធាវីរបស់លោកបានដាក់ឯកសារសង្ខេបផ្លូវច្បាប់ទៅតុលាការដែលនិយាយថា Trump "ប្រឆាំងនឹងការហាមឃាត់ TikTok" និង "ស្វែងរកសមត្ថភាពក្នុងការដោះស្រាយបញ្ហានៅក្នុងដៃ តាមរយៈមធ្យោបាយនយោបាយនៅពេលដែលលោកចូលកាន់តំណែង" ។
ហើយរឿងនេះបានកើតឡើងមួយសប្តាហ៍បន្ទាប់ពី Trump បានជួបនាយកប្រតិបត្តិ TikTok គឺលោក ស៊ូជីឈូ (Shou Zi Chew) នៅឯអចលនទ្រព្យ Mar-a-Lagoរបស់លោកក្នុងរដ្ឋ Florida ។
ប៉ុន្តែកាលពីថ្ងៃច័ន្ទ ទី ១៣ ម្សិលមិញនេះ សមាជិកសភាគណបក្សប្រជាធិបតេយ្យពីររូបគឺព្រឹទ្ធសមាជិកក៏បានអំពាវនាវដល់សភា និងប្រធានាធិបតី Joe Biden ឱ្យបន្តកាលបរិច្ឆេទកំណត់ថ្ងៃទី ១៩ ខែមករា នេះដូចដើម។
ក្នុងអំឡុងពេលសវនាការរបស់តុលាការកំពូលកាលពីសប្តាហ៍មុន ចៅក្រមហាក់ដូចជាមានទំនោរក្នុងការរក្សាច្បាប់នេះ និងប្រកាន់ខ្ជាប់ដល់កាលកំណត់។
ក្នុងរយៈពេលជិតបីម៉ោងនៃអំណះអំណាង ចៅក្រមទាំងប្រាំបួនបានវិលត្រឡប់មកវិញម្តងហើយម្តងទៀតចំពោះកង្វល់សន្តិសុខជាតិដែលបង្កឱ្យមានច្បាប់។
ហើយរដ្ឋបាល Biden បានអះអាងថា បើគ្មានការលក់ទេ TikTok អាចត្រូវបានប្រើប្រាស់ដោយប្រទេសចិនជាឧបករណ៍សម្រាប់ចារកម្ម និងឧបាយកលនយោបាយ។
ជុំវិញនៃការចោទប្រកាន់នេះ ក្រុមហ៊ុន TikTok បានបដិសេធម្តងហើយម្តងទៀតនូវឥទ្ធិពលណាមួយដោយបក្សកុម្មុយនិស្តចិន ហើយបាននិយាយថាច្បាប់ហាមឃាត់ TikTokនៅក្នុងសហរដ្ឋអាមេរិកបានរំលោភលើសិទ្ធិនិយាយ ដោយសេរីនៃវិសោធនកម្មលើកទីមួយរបស់អ្នកប្រើប្រាស់របស់ខ្លួនថែមទៀតផង។
