បាងកក៖  ​បើ​តាម​ការ​ឲ្យ​ដឹង​ពី​ក្រុម​ផ្តល់​ជំនួយ​នៅ​ក្នុង​តំបន់​ដែល​រងគ្រោះ​ខ្លាំង​បំផុត​ក្នុង​ប្រទេស​មីយ៉ាន់ម៉ា បាននិយាយថា តម្រូវការបន្ទាន់ក្រោយពីគ្រោះរញ្ជួយដីក្នុងប្រទេសមីយ៉ាន់ម៉ា គឺ ទីជំរក អាហារ និងទឹក បន្ទាប់ពីគ្រោះធម្មជាតិរញ្ជួយដី ដែលបានសម្លាប់មនុស្សជាង 2,700 ប៉ុន្តែសង្រ្គាមស៊ីវិលរបស់ប្រទេសនេះអាចរារាំងជំនួយទៅ ដល់អ្នកដែលត្រូវការជំនួយ។

មេដឹកនាំយោធាមីយ៉ាន់ម៉ា លោក Min Aung Hlaing បាននិយាយនៅក្នុងសុន្ទរកថាតាមទូរទស្សន៍មួយកាលពីថ្ងៃអង្គារ ទី1 ខែមេសានេះថា  ចំនួនអ្នកស្លាប់បានឡើងដល់ 2,719 នាក់ហើយ ត្រូវបានគេរំពឹងថានឹងកើនឡើងដល់ជាង 3,000នាក់ ។ លោកបាននិយាយថា មនុស្សចំនួន 4,521 នាក់ទៀតបានរងរបួស និង 441 នាក់បានបាត់ខ្លួនផងដែរក្នុងគ្រោះរញ្ជួយដីនេះ ។ ការរញ្ជួយដីកម្រិត 7.7 រ៉ិចទ័រ ដែលបានវាយប្រហារ នៅរង្វង់វេលាម៉ោងថ្ងៃត្រង់កាលពីថ្ងៃសុក្រទី២៩ មីនា ២០២៥  គឺជាកម្លាំងខ្លាំងបំផុតដែលបានវាយប្រហារប្រទេសអាស៊ីអាគ្នេយ៍ ក្នុងរយៈពេលជាងមួយសតវត្សរ៍ ដោយបានបំផ្លិចបំផ្លាញវត្តបុរាណ និងអគារទំនើបៗដូចគ្នា។ 

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌បាននិយាយថា នៅក្នុងតំបន់ Mandalay របស់ប្រទេសមីយ៉ាន់ម៉ា មានកុមារចំនួន 50 នាក់ និងគ្រូបង្រៀនពីរនាក់ ត្រូវបានសម្លាប់ដោយគ្រោះរញ្ជួយដី ព្រោះសាលាមត្តេយ្យរបស់ពួកគេបានដួលរលំសង្កាត់។

អង្គការសហប្រជាជាតិ ថា "នៅក្នុងតំបន់ដែលរងគ្រោះខ្លាំងបំផុត ក្រុមសង្គ្រោះបន្ទាន់ កំពុងតែធ្វើការដោយមិននឿយហត់ដើម្បីកំណត់ទីតាំងអ្នកនៅរស់រានមានជីវិត និងផ្តល់ជំនួយសង្គ្រោះជីវិត" ។