ភ្នំពេញ ៖ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ជម្រាបមក លោកប្រធានសាលាដំបូងរាជធានី-ខេត្ត អំពីការដាក់ឱ្យអនុវត្តនូវទម្រង់រួមនៃដីកាសម្រេចរក្សាការពារ និងដីកាសម្រេចអំពីប្រាតិភោគនៅតាមសាលាដំបូងរាជធានី-ខេត្ត។
ដោយយោង ៖
– ក្រមនីតិវិធីរដ្ឋប្បវេណីនៃព្រះរាជាណាចក្រកម្ពុជា
– សេចក្តីសម្រេចចិត្តមហាសន្និបាតបូកសរុបលទ្ធផលការងារវិស័យយុត្តិធម៌ទូទាំងប្រទេសឆ្នាំ២០២៣ និងកំណត់ទិសដៅការងារជាអាទិភាពបន្ត។
ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ សូមជម្រាប លោកប្រធានសាលាដំបូង ជ្រាបថា យោងតាមសេចក្តីសម្រេចចិត្តមហាសន្និបាតបូកសរុបលទ្ធផលការងារវិស័យយុត្តិធម៌ទូទាំងប្រទេស ឆ្នាំ២០២៣ និងកំណត់ទិសដៅការងារជាអាទិភាពបន្ត និងដើម្បីធានាបាននូវសង្គតិភាព ទាំងលើទម្រង់ ទាំងលើខ្លឹមសារគោល នៃដីកាសម្រេចរក្សាការពារ និងពង្រឹងប្រសិទ្ធភាពនៃការអនុវត្ត ក្រសួងយុត្តិធម៌ និងដោយបានប្រជុំពិគ្រោះ យោបល់ជាមួយតំណាងសាលាដំបូងរាជធានី-ខេត្ត បានរៀបចំនូវទម្រង់រួមនៃដីកាសម្រេចរក្សាការពារ និង ដីកាសម្រេចអំពីប្រាតិភោគសម្រាប់យកទៅអនុវត្តនៅតាមសាលាដំបូងរាជធានី-ខេត្ត ដូចមានជូនភ្ជាប់ជា ឧបសម្ព័ន្ធនៃលិខិតនេះ។
អាស្រ័យហេតុនេះ សូមលោកប្រធានសាលាដំបូង ពិនិត្យ និងចាត់ចែងអនុវត្ត ព្រមទាំងណែនាំអនុវត្តដល់ចៅក្រម និងតួអង្គដែលមានការពាក់ព័ន្ធ ឱ្យមានប្រសិទ្ធភាពខ្ពស់ ៕