ខេត្តកំពង់ចាម ៖ នៅក្នុងអំឡុងបុណ្យចូលឆ្នាំថ្មីប្រពៃណីជាតិនៅឆ្នាំនេះ រដ្ឋបាលខេត្តកំពង់ចាម គ្រោងនឹងរៀបចំបំពាក់ប្រព័ន្ធ Free WiFi ដើម្បីឱ្យប្រជាពលរដ្ឋ ក៏ដូចជាភ្ញៀវជាតិ និងអន្តរជាតិដែលមកលេងកម្សាន្តអាចប្រើប្រាស់បានដោយសេរី។ នេះគឺជាលក្ខណៈពិសេសថ្មីមួយទៀតដែលរដ្ឋបាលខេត្តកំពង់ចាមគ្រោងនឹងរៀបចំឡើងដើម្បីធ្វើយ៉ាងណាទាក់ទាញអ្នកមកលេងកម្សាន្តឱ្យបានកាន់តែច្រើនឡើងបន្ថែមទៀត។ អភិបាលខេត្តកំពង់ចាម លោក អ៊ុន ចាន់ដា បានបង្ហើបប្រាប់សារព័ត៌មានបែបនេះ សម្រាប់ភ្ញៀវទេសចរមកលេងសង្រ្កាន្តកំពង់ចាម និងមាន Free Wifi internet លេងដោយឥតគិតថ្លៃក្នុងក្រុងកំពង់ចាម ខប់ខប់ហើយកំពង់ចាមឆ្នាំនេះ។ 
បើតាមលោកអភិបាលខេត្តកំពង់ចាម ការរៀបចំបំពាក់ប្រព័ន្ធ Free WiFiនេះ នឹងជាផ្នែកថ្មីមួយទៀតក្នុងចំណោមលក្ខណៈពិសេស និងថ្មីៗជាច្រើនដែលខេត្តកំពង់ចាមកំពុងរៀបចំត្រៀមទទួលបុណ្យចូលឆ្នាំថ្មីក្នុងឆ្នាំនេះ។ លោកអះអាងថា ការបំពាក់ប្រព័ន្ធ Free WiFi នេះ នឹងទាក់ទាញប្រជាពលរដ្ឋនៅក្នុងខេត្តកំពង់ចាម និងខេត្តដទៃៗទៀត ក៏ដូចជា ភ្ញៀវអន្តរជាតិមកលេងកម្សាន្តសប្បាយជាមួយគ្នាក្រោមដំបូលសុខសន្តិភាព។ លោកបន្តថា៖ ដ្បិតថាមានគម្រោងរៀបចំបំពាក់ប្រព័ន្ធ Free WiFi ក៏ពិតមែន ប៉ុន្តែ មកដល់ពេលនេះ គម្រោងនេះមិនទាន់មានការប្រកាសជាផ្លូវការនៅឡើយទេ។ លោក អ៊ុន ចាន់ដា បានអះអាងថា នៅពេលនេះ ក្រុមការងាររបស់លោកកំពុងជជែកពិភាក្សាជាមួយក្រុមហ៊ុនបណ្តាញទូរស័ព្ទធំមួយ ដើម្បីរៀបចំបំពាក់ប្រព័ន្ធ Free WiFi នេះ។ យ៉ាងណាក៏ដោយ លោកមានសុទិដ្ឋិនិយមថា ក្រុមហ៊ុនបណ្តាញទូរស័ព្ទនោះ នឹងសហការជាមួយរដ្ឋបាលខេត្តកំពង់ចាម ដើម្បីរៀបចំបំពាក់ប្រព័ន្ធ Free WiFi អនុញ្ញាតឱ្យអ្នកមកលេងកម្សាន្តបុណ្យចូលឆ្នាំថ្មីប្រពៃណីជាតិនាពេលខាងមុខនេះ បានប្រើប្រាស់ដោយសេរី និងដោយរីករាយ។
ជាមួយគ្នានេះ លោកអភិបាលខេត្តកំពង់ចាមក៏បានអំពាវនាវដល់ប្រជាពលរដ្ឋទាំងក្នុងខេត្តនិងក្រៅខេត្ត រួមទាំងភ្ញៀវទេសចរអន្តរជាតិឱ្យមកចូលរួមលេងកម្សាន្តបុណ្យចូលឆ្នាំថ្មីប្រពៃណីជាតិនៅទីរួមខេត្តកំពង់ចាម ដោយអាចប្រើប្រាស់WiFi បានដោយសេរី។ បន្ថែមលើនេះ លោកគូសបញ្ជាក់ថា ការលក់ដូរ និងសេវាកម្មផ្សេងៗនៅខេត្តកំពង់ចាម មិនមានការដំឡើងថ្លៃនោះទេ ហើយបញ្ហាសុខ សុវត្ថិភាព គឺត្រូវបានធានា ដោយរដ្ឋបាលខេត្តបានត្រៀមលក្ខណៈរួចរាល់អស់ហើយ ដើម្បីការពារសន្តិសុខ សណ្តាប់ធ្នាប់នៅទូទាំងខេត្តកំពង់ចាមក្នុងឱកាសបុណ្យចូលឆ្នាំថ្មីប្រពៃណីជាតិខាងមុខនេះ។
គួរបញ្ជាក់ជូនថា កាលពីបុណ្យចូលឆ្នាំថ្មីកាលពីឆ្នាំមុន ខេត្តកំពង់ចាមបានរៀបចំសង្រ្កាន្តកំពង់ចាមនៅទីតាំងមុខសាលាខេត្ត។ ប្រជាពលរដ្ឋក្នុងខេត្ត និងក្រៅខេត្ត ព្រមទាំងភ្ញៀវទេសចរអន្តរជាតិប្រមាណជាង៥លានដងនាក់ បានមកលេងកម្សាន្តបុណ្យចូលឆ្នាំថ្មីនៅក្នុងខេត្តកំពង់ចាម។ សម្រាប់ឆ្នាំនេះវិញ លោក អ៊ុន ចាន់ដា រំពឹងថា នឹងមានអ្នកមកលេងកម្សាន្តនៅក្នុងខេត្តកំពង់ចាមប្រហាក់ប្រហែល ឬអាចលើសពីឆ្នាំ២០២៤ទៅទៀត។ 
សូមបញ្ជាក់ថា ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានណែនាំឱ្យរៀបចំព្រឹត្តិការណ៍ «សង្ក្រាន្ដ» នៅតាមបណ្ដារាជធានី-ខេត្ត ដើម្បីថែរក្សា និងលើកស្ទួយវប្បធម៌ខ្មែរ ហើយ សម្ដេចមានក្ដីសង្ឃឹមថា សង្ក្រាន្ដកម្ពុជា នឹងចុះបញ្ជីក្នុងបេតិកភណ្ឌពិភពលោក នាពេលឆាប់ៗនេះ។ ការរៀបចំព្រឹត្តិការណ៍សង្ក្រាន្ដនៅតាមបណ្ដារាជធានី-ខេត្ត គឺបន្ថែមលើព្រឹត្តិការណ៍ «អង្គរសង្ក្រាន្ដ» នៅខេត្តសៀមរាប ក្នុងឱកាសពិធីបុណ្យចូលឆ្នាំថ្មី នាពេលខាងមុខនេះ។
សម្ដេចបវរធិបតី ហ៊ុន ម៉ាណែត សង្ឃឹមថា ចូលឆ្នាំថ្មី នៅឆ្នាំនេះ និងឆ្នាំក្រោយៗទៀត នឹងមានការលេងល្បែងប្រជាប្រីយឱ្យផុលផុសឡើងវិញ នៅគ្រប់ទីកន្លែង នៅទូទាំងប្រទេស។
សម្ដេចបវរធិបតី សង្កេតឃើញថា សន្ទុះនៃការលេងល្បែងប្រជាប្រីយខ្មែរ មកពេលនេះ យុវជនខ្មែរ បានរួមគ្នាលេងយ៉ាងផុលផុស ដើម្បីគាំទ្រដល់ល្បែងប្រជាប្រិយ៍ និងសល្បៈវប្បធម៌ខ្មែរ ៕