សិង្ហបុរី៖ ប្រាក់ដុល្លារបានធ្លាក់ចុះយ៉ាងខ្លាំងនាថ្ងៃព្រហស្បតិ៍នេះ ខណៈដែលប្រាក់អឺរ៉ូបានឡើងថ្លៃ បន្ទាប់ពីប្រធានាធិបតីអាមេរិក Donald Trump បានប្រកាសពន្ធគយកាន់តែគឃ្លើនលើសពីការរំពឹងទុក ដែលជាការប្រឆាំងនឹងដៃគូពាណិជ្ជកម្មរបស់លោក ដែលជាហេតុធ្វើឱ្យទីផ្សារពិភពលោកកាន់តែមានភាពជ្រួលច្របល់ ស្របពេលដែលវិនិយោគិនជាច្រើនកំពុងតែព្យាយាមស្វែងរកទីផ្សារដែលមានសុវត្ថិភាពដូចជា ប្រាក់យ៉េន និងហ្វ្រង់ស្វីស។

តាមរយៈការប្រកាសពន្ធ ដែលមានកម្រិតខ្ពស់បានធ្វើឱ្យទីផ្សារសកលទាំងមូលមានការព្រួយបារម្ភខ្លាំង ដោយសារតែភាគហ៊ុនសកលបានធ្លាក់ចុះ ហើយវិនិយោគិនជាច្រើនកំពុងរអ៊ូរទាំចំពោះសុវត្ថិភាពនៃមូលបត្របំណុលដូចជាមាសជាដើម។ 

ដោយលោក Trump បាននិយាយថាលោកនឹងដាក់ពន្ធមូលដ្ឋាន 10% លើការនាំចូលទាំងអស់ទៅកាន់សហរដ្ឋអាមេរិក និងពន្ធខ្ពស់លើដៃគូពាណិជ្ជកម្មដ៏ធំបំផុតមួយចំនួនរបស់អាមេរិកផងដែរ។ 

ហើយចំពោះការកំណត់ពន្ធនេះនឹងចូលជាធរមាននៅថ្ងៃទី ៩ ខែមេសាឆាប់ៗនេះហើយ ដោយទំនងជាកំណត់គោលដៅប្រទេសប្រមាណ ៦០។ 

ចំពោះពន្ធថ្មីនេះកំពុងតែបានជំរុញឱ្យមានសង្គ្រាមពាណិជ្ជកម្ម ដោយធ្វើឱ្យទីផ្សារកាន់តែមានការភ័យខ្លាចកាន់តែខ្លាំងឡើងថា សង្រ្គាមពាណិជ្ជកម្មពេញលេញអាចបង្កឱ្យមានការធ្លាក់ចុះសេដ្ឋកិច្ចពិភពលោកយ៉ាងខ្លាំងផងដែរ។ 

ដោយក្នុងនោះយើងឃើញថា លោក Trump ក៏បានដាក់ពន្ធរួចហើយទៅលើអាលុយមីញ៉ូម ដែក និងរថយន្ត ក៏ដូចជាការដំឡើងពន្ធលើទំនិញទាំងអស់មកពីប្រទេសចិនទៀតផង។

ហើយដំណាក់កាលនេះផងដែរ ចំពោះប្រាក់ដុល្លារអូស្រ្តាលីបានធ្លាក់ចុះ 0.4% មកនៅត្រឹម 0.6274 ដុល្លារប៉ុណ្ណោះ ខណៈប្រាក់ដុល្លារនូវែលសេឡង់បានធ្លាក់ចុះ 0.12% មកនៅត្រឹម 0.5738 ដុល្លារប៉ុណ្ណោះ។