នៅថ្ងៃទី ០២ ខែមេសា កាលពីម្សិលមិញនេះ អាមេរិកបានអនុវត្តរចនាសម្ព័ន្ធពន្ធថ្មីក្រោមគំនិតផ្តួចផ្តើម ដោយណែនាំពន្ធជាសកលចំនួន 10 ភាគរយទៅលើទំនិញនាំចូលទាំងអស់ ក៏ដូចជាពន្ធគយបន្ថែមដែលបានកំណត់គោលដៅប្រទេសជាក់លាក់មួយចំនួនដោយផ្អែកលើការអនុវត្តពាណិជ្ជកម្មរបស់ពួកគេ។

ជុំវិញនៃការប្រកាសពន្ធនេះ លោក Trump បានហៅវិធានការនេះថាជា "ការប្រកាសឯករាជ្យភាពសេដ្ឋកិច្ច" ដោយលោកបានប្តេជ្ញាថានឹងពង្រឹងផលិតកម្មក្នុងស្រុកដោយកម្រិតទីផ្សារជាមួយដៃគូប្រកួតប្រជែងបរទេស។ 

ក្នុងការអនុវត្តពន្ធរបស់លោក ត្រាំ ទៅលើប្រទេសមួយចំនួន ឃើញថាកម្ពុជាកំពុងប្រឈមនឹងការយកពន្ធរហូតទៅដល់ ៤៩ភាគរយឯណោះ ដែលជាការដាក់កម្រិតពន្ធខ្ពស់បំផុតក្នុងចំណោមប្រទេសជាច្រើនទៀត ដែលមានរហូតទៅដល់ ៥០ប្រទេស។ 

បន្ថែមពីនេះ បើនិយាយពីការនាំចេញវិញ កម្ពុជាបាននាំចេញទៅសហរដ្ឋអាមេរិកក្បែរ ៩ពាន់លានដុល្លារក្នុងមួយឆ្នាំ ប៉ុន្តែបើនិយាយពីការនាំចូលវិញគឺមិនដល់ ៣០០លានដុល្លារនោះទេ។ 

ហើយចំពោះការនាំចូលនេះ មានតែរថយន្ត និងសម្ភារៈអេឡិចត្រូនិចប៉ុណ្ណោះ ដោយពន្ធនាំចូលរថយន្ត ជាពន្ធដែលថ្លៃជាងគេ។ 

ប្រសិនជាយើងធ្វើការធៀបជាមួយនឹងទំហំពាណិជ្ជកម្មចិនវិញ កម្ពុជានាំចេញទៅចិនចំនួន ១.៧៥ ពាន់លានដុល្លារ រីឯការនាំចូលវិញគឺមានចំនួនរហូតទៅដល់ ១៣.៤ ពាន់លានដុល្លារឯណោះ បើគិតក្នុងឆ្នាំ ២០២៤ ដោយការនាំចូលភាគច្រើនជាវត្ថុធាតុដើមសម្រាប់វិស័យកាត់ដេរ គ្រឿងចក្រ និងសម្ភារៈអេឡិចត្រូនិក ជាដើម។

យ៉ាងណាមិញ មិនមែនមានតែកម្ពុជានោះទេដែលទទួលរងនូវការដាក់ពន្ធពីអាមេរិកដោយក្នុងនោះក៏មានប្រទេសជាច្រើនទៀតផងដែរដូចជា ចិន៖ ៣៤%, សហភាពអឺរ៉ុប៖ ២០%, វៀតណាម៖ ៤៦%, តៃវ៉ាន់៖ ៣២%, ជប៉ុន៖ ២៤%, ឥណ្ឌា៖ ២៦%, កូរ៉េខាងត្បូង៖ ២៥%, ប្រទេសថៃ៖ ៣៦%, ស្វីស៖ ៣១%, ឥណ្ឌូនេស៊ី៖ ៣២%, ម៉ាឡេស៊ី៖ ២៤%, ចក្រភពអង់គ្លេស៖ 10%, អាហ្វ្រិកខាងត្បូង៖ ៣០%, ប្រេស៊ីល៖ 10%, បង់ក្លាដែស៖ ៣៧%, សិង្ហបុរី៖ ១០%, អ៊ីស្រាអែល៖ ១៧%, ហ្វីលីពីន៖ ១៧%, ឈីលី៖ ១០%, អូស្ត្រាលី៖ ១០%, ប៉ាគីស្ថាន៖ ២៩%, តួកគី៖ 10%, ស្រីលង្កា៖ ៤៤%, កូឡុំប៊ី៖ ១០%, ប្រទេសប៉េរូ៖ 10%, នីការ៉ាហ្គា៖ ១៨%, ន័រវែស៖ ១៥%, កូស្តារីកា៖ ១០%, ហ្សកដានី៖ ២០%, សាធារណរដ្ឋដូមីនីកែន៖ 10%, អារ៉ាប់រួម៖ 10%, នូវែលសេឡង់៖ 10%, អាហ្សង់ទីន៖ ១០%, ឡាវ៖ ៤៨%។ល។

យោងតាមតារាងដែលលោក ត្រាំ បានប្រកាសពន្ធទៅលើប្រទេសនីមួយៗដែលមានចំនួនជាង ៦០ ប្រទេស យើងសង្កេតឃើញថា ក្នុងនោះមានតែកម្ពុជាប៉ុណ្ណោះដែលទទួលរងនូវការដាក់ពន្ធធ្ងន់ជាងគេចំណោមប្រទេសជាង៦០ នោះ។