ភ្នំពេញ៖ លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា៖ «រាជរដ្ឋាភិបាលកម្ពុជាមានក្រុមការងារវាយតម្លៃអំពីកម្មវិបាក នៃគោលនយោបាយបដិការពន្ធនាំចូល (Reciprocal Tariffs) របស់សហរដ្ឋអាម៉េរិក ដើម្បីដាក់ចេញវិធានការចាំបាច់ ក្នុងការគ្រប់គ្រងសភាពការណ៍ ធានាស្ថិរភាពពាណិជ្ជកម្មជាមួយដៃគូអន្តរជាតិ»។ 
លោកឧបនាយករដ្ឋមន្ត្រី បានលើកឡើងយ៉ាងដូច្នេះ នាឱកាសជំនួបជាមួយ លោក Kenichiro Kashiwase ប្រធានបេសកកម្ម នៃមូលនិធិរូបិយវត្ថុអន្តរជាតិ (IMF) កាលពីថ្ងៃទី០៣ ខែមេសា ឆ្នាំ២០២៥ ម្សិលម៉ិញ នៅទីស្តីការក្រសួងសេដ្ឋកិច្ច និងហិរញ្ញវត្ថុ។
ក្នុងបរិការណ៍នៃភាពមិនប្រាកដប្រជា, ការផ្លាស់ប្តូរភ្លាមៗតាមរយៈគោលនយោបាយ គាំពារនិយម (Protectionism) និងសង្គ្រាមពាណិជ្ជកម្ម ដែលបានលេចកើនឡើងកាន់តែខ្លាំង និងឥតព្រាងទុក ជាពិសេសគោលនយោបាយបដិការពន្ធនាំចូល (Reciprocal Tariffs) របស់សហរដ្ឋអាម៉េរិក, អគ្គបណ្ឌិតសភាចារ្យ អូន ព័ន្ធមុនីរ័ត្ន បានគូសបញ្ជាក់ថា «រាជរដ្ឋាភិបាល បាននិងកំពុងតាមដានបញ្ហានេះជាប្រចាំ ហើយបានរៀបចំភ្លាមៗនូវ ក្រុមការងារ ដើម្បីវាយតម្លៃអំពីកម្មវិបាកនៃគោលនយោបាយបដិការពន្ធនាំចូលរបស់សហរដ្ឋអាម៉េរិក ដើម្បីដាក់ចេញវិធានការចាំបាច់ ក្នុងការគ្រប់គ្រងសភាពការណ៍ ធានាស្ថិរភាពពាណិជ្ជកម្មជាមួយដៃគូអន្តរជាតិ ក៏ដូចជាដើម្បីលើកកម្ពស់ភាពប្រកួតប្រជែងរបស់កម្ពុជាក្នុងរយៈពេលខ្លី និងមធ្យមខាងមុខ»។
លើទិដ្ឋភាពហិរញ្ញវត្ថុសាធារណៈសម្រាប់រយៈពេលមធ្យម, លោកឧបនាយករដ្ឋមន្ត្រី ក៏បានបង្ហាញពីការគិតគូររបស់រាជរដ្ឋាភិបាល ក្នុងការបន្តពង្រឹងការប្រមូលចំណូល, បង្កើនប្រសិទ្ធភាពចំណាយ ព្រមទាំងកសាងទ្រនាប់ ថវិកាឡើងវិញ ជាដើម ។ ជាក់ស្តែង, រាជរដ្ឋាភិបាលទើបបានដាក់ចេញឱ្យអនុវត្តនូវ «យុទ្ធសាស្ត្រកៀរគរចំណូល របស់រាជរដ្ឋាភិបាលនីតិកាលទី៧នៃរដ្ឋសភា» កាលពីដើមឆ្នាំ២០២៥ និងកំពុងត្រៀមដាក់ចេញនូវគោល នយោ បាយផ្សេងៗទៀតដូចជា «កម្មវិធីលើកកម្ពស់ភាពប្រកួតប្រជែង បង្កើនពិពិធកម្ម និងពង្រឹងភាពធន់ ដើម្បី កំណើនសេដ្ឋកិច្ច នៅក្នុងបរិការណ៍សកល ដែលមានភាពមិនប្រាកដប្រជាខ្ពស់ឆ្នាំ ២០២៤-២០២៨» និង ក្របខ័ណ្ឌហិរញ្ញវត្ថុសាធារណៈរយៈពេលមធ្យម ឆ្នាំ ២០២៦-២០២៨» ផងដែរ។
លោក Kenichiro Kashiwase ប្រធានបេសកកម្ម នៃមូលនិធិរូបិយវត្ថុអន្តរជាតិ (IMF) បានកោតសរសើរចំពោះរាជរដ្ឋាភិបាលកម្ពុជាលើភាព-បុរេសកម្ម និង ម្ចាស់ការក្នុងការគ្រប់គ្រងសេដ្ឋកិច្ច និងហិរញ្ញវត្ថុសាធារណៈ ព្រមទាំងផ្លែផ្កាកំណើនដែលកម្ពុជាទទួលបាននា ពេលកន្លងមក និងការឈានទៅសម្រេចគោលដៅរយៈពេលវែងខាងមុខ។ 
ជាមួយគ្នានេះ, ក្រុមការងារ IMF ក៏នឹងបន្តតាមដាន និងវាយតម្លៃស្ថានភាព និងកម្មវិបាកនៃគោលនយោបាយរបស់សហរដ្ឋអាម៉េរិកមកលើសេដ្ឋកិច្ចកម្ពុជា ក៏ដូចជាត្រៀមផ្តល់អនុសាសន៍ និងកិច្ចសហការជាមួយរាជរដ្ឋាភិបាលកម្ពុជា ក្នុងន័យធានាចីរភាព និងស្ថិរភាពម៉ាក្រូសេដ្ឋកិច្ច និងហិរញ្ញវត្ថុសាធារណៈនៅកម្ពុជា ។ IMF ក៏ប្តេជ្ញាបន្តផ្តល់នូវជំនួយបច្ចេកទេស លើចំណុចអាទិភាពរបស់រាជរដ្ឋាភិបាលកម្ពុជា ជាពិសេសលទ្ធភាពនៃការអនុវត្ត Policy Coordination Instruments (PCI) ដែលជាគំនិតផ្តួចផ្តើមរបស់ IMF ក្នុងការជួយសម្រួល និងពង្រឹងកិច្ចសន្ទនាជាមួយ ប្រទេសដៃគូ ក្នុងការងារកែទម្រង់នានា និងកៀរគរប្រភពហិរញ្ញប្បទាន។ 
សូមរម្លឹកថា ប្រធានាធិបតីសហរដ្ឋអាមេរិក លោក ដូណាល់ ត្រាំ បានសម្រេចដំឡើងពន្ធគយលើទំនិញនាំចូលពីកម្ពុជា ចំនួនប្រមាណ ៤៩% ហើយការសម្រេចនេះ នឹងចូលជាធរមាន នៅថ្ងៃទី០៩ ខែមេសា ឆ្នាំ២០២៥ ខាងមុខនេះផងដែរ៕