ភ្នំពេញ-ស្ត្រីវ័យចំណាស់ពិកាភ្នែកទាំងសងខាងម្នាក់បានស្លាប់បាត់បង់ជីវិតភ្លាមៗនៅកន្លែងកើតហេតុ. ចំណែកអ្នកបើកកង់៣និងស្ត្រីរួមដំណើរម្នាក់ទៀតរងរបួសធ្ងន់នៅក្នុងហេតុការណ៍គ្រោះថ្នាក់ចរាចរណ៍ រវាងរថយន្តកាម៉ារី បាឡែនបើកបុកជាមួយម៉ូតូកង់៣ឥណ្ឌាមួយគ្រឿង កាលពីវេលាម៉ោង៩និង១៥នាទី ព្រឹក ថ្ងៃទី៣០ ខែធ្នូ ឆ្នាំ២០២៤. ស្ថិតនៅចំនុចផ្លូវបំបែកជាបួន ស្ថិតនៅភូមិព្រៃមូលសង្កាត់ ក្រាំងធ្នង់ ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថាសពស្ត្រីរងគ្រោះមានឈ្មោះ សុខ ស៊ីណា. អាយុ ៦៤ឆ្នាំ. ស្នាក់នៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។ប្រភពបន្ថែមថា មុនពេល កើត ហេតុ ស្ត្រីរងគ្រោះបានហៅម៉ូតូកង់បីមួយគ្រឿងជិះចេញពីផ្ទះបម្រុងទៅពេទ្យមរតកតេជោ ដើម្បីឲ្យ គ្រូពេទ្យព្យាបាលភ្នែករបស់គាត់ដែលងងឹតមើលមិនឃើញដែលក្នុងនោះក៏មានស្រ្តីម្នាក់ទៀតត្រូវជាប្អូន បានរួមដំណើរជាមួយផងដែរ។លុះពេលទៅដល់ចំណុចផ្លូវបំបែកជាបួនអ្នកបើកកង់បីបើកក្នុងល្បឿនលឿនស្របពេលនោះក៏មានរថយន្តមួយគ្រឿងម៉ាកកាម៉ារីបាឡែនពណ៌ទឹកប្រាក់ពាក់ផ្លាកលេខភ្នំពេញ 2R-6308 បើកបរដោយស្ត្រីម្នាក់ក្នុងទិសដៅពីលិចទៅកើតក្នុងល្បឿនលឿនដូចគ្នា បានបុកចំពាក់ កណ្តាលម៉ូតូកង់បីយ៉ាងពេញទំហឹងបណ្តាលឲ្យក្រឡាប់ខ្ទាតស្ត្រីរងគ្រោះប្រហែលជិត១០ម៉ែត្របោក ក្បាលស្លាប់ភ្លាមៗនៅកន្លែងកើតហេតុតែម្តង. ចំណែកអ្នកបើកបរកង់៣និងស្ត្រីរួមដំណើរម្នាក់ ទៀត ក៏បានរងរបួសធ្ងន់ផងដែរ ។

បន្ទាប់ពីកើតហេតុជនរងគ្រោះដែលរងរបួសធ្ងន់ត្រូវបានរថយន្តសាម៊ុយមកដឹកបញ្ជួនទៅកាន់មន្ទីរពេទ្យ ដើម្បីសង្គ្រោះ។ចំណែកសពសមត្ថកិច្ចធ្វើកំណត់ហេតុប្រគល់ជូនសាច់ញាតិដើម្បីរៀបចំចាត់ចែងធ្វើ បុណ្យតាមប្រពៃណី ។ ដោយឡែករថយន្តនិងម៉ូតូកង់បីសមត្ថកិច្ចធ្វើការវាស់វែងរួចបានអូសយកទៅ រក្សាទុកនៅការិយាល័យជំនាញចរាចរណ៍នៃស្នងការដ្ឋាននគរបាលរាជធានីភ្នំពេញដើម្បីរង់ចាំធ្វើការ  ដោះស្រាយនៅពេលក្រោយ៕