លោក Sir Keir Starmer បាននិយាយថា ប្រធានាធិបតីរុស្ស៊ីលោក វ្ល៉ាឌីមៀ ពូទីន នឹងរំលោភលើកិច្ចព្រមព្រៀងសន្តិភាពជាមួយអ៊ុយក្រែន ប្រសិនបើប្រទេសនេះមិនត្រូវទទួលបានការការពារ។ 

លោក Sir Keir Starmer បានលើកឡើងបែបនេះបន្ទាប់ពីបានចូលរួមកិច្ចប្រជុំរបស់មេដឹកនាំយោធាជាន់ខ្ពស់នៅឯទីក្រុងឡុងដ៍ ដែលមានប្រទេសចំនួន ២០ បានប្រមូលផ្ដុំគ្នានៅក្នុងកិច្ចប្រជុំមួយ ដើម្បីពិភាក្សាអំពីសំណើសម្រាប់កងទ័ពនៅក្នុងប្រទេសអ៊ុយក្រែន ដើម្បីជាការជួយធានាសន្តិសុខរបស់ប្រទេសដែលជាផ្នែកនៃកិច្ចព្រមព្រៀងសន្តិភាពណាមួយ។ 

លោក Sir Keir បានបន្ថែមថា ការរៀបចំសន្តិសុខនឹងបញ្ជាក់យ៉ាងច្បាស់ចំពោះប្រទេសរុស្ស៊ីថានឹងមាន "ផលវិបាកធ្ងន់ធ្ងរ ប្រសិនបើពួកគេបំពានលើកិច្ចព្រមព្រៀងណាមួយ"។

ក្នុងនោះផងដែរ លោក Sir Keir បានច្រានចោលការដាក់ពង្រាយកងទ័ពអង់គ្លេសឡើងវិញពីប្រទេសនានាដូចជា អេស្តូនី ជាដើម ដើម្បីប្តេជ្ញាចិត្តចំពោះទីក្រុង Kyiv ដោយនិយាយថា "មិនមានការដកថយពីការប្តេជ្ញាចិត្តរបស់យើងចំពោះប្រទេសផ្សេងទៀតទេ"។

យោងតាមសារព័ត៌មាន Daily Telegraph ការបញ្ជូនយន្តហោះចម្បាំង Typhoon របស់អង់គ្លេសទៅកាន់ប្រទេសអ៊ុយក្រែន ដើម្បីផ្តល់គម្របអាកាសសម្រាប់កងទ័ពគឺជាសំណើមួយក្នុងចំណោមសំណើដែលត្រូវបានពិភាក្សាក្នុងកិច្ចប្រជុំ។ 

ហើយរដ្ឋមន្ត្រីកងកម្លាំងប្រដាប់អាវុធបាននិយាយថា លោករំពឹងថាការពិភាក្សានឹងធានាឱ្យ "កងកម្លាំងណាមួយនៅក្នុងឬនៅជុំវិញអ៊ុយក្រែនអាចជឿទុកចិត្តបានតាមដែលអាចធ្វើទៅបាន"។

គួរបញ្ជាក់ថា ពាក់ព័ន្ធនឹងការហៅទូរស័ព្ទរវាងប្រធានាធិបតីអាមេរិកលោក Donald Trump, Putin និង Zelensky បានបរាជ័យក្នុងការបង្កើតបទឈប់បាញ់រយៈពេល 30 ថ្ងៃដែលសេតវិមានបានរំពឹងទុក។ 

កិច្ចពិភាក្សាចុងក្រោយនេះ បានកើតឡើងនៅពេលដែលសហរដ្ឋអាមេរិក ព្យាយាមធ្វើអន្តរាគមលើបទឈប់បាញ់រវាងប្រទេសទាំងពីរ បន្ទាប់ពីមានការប្រយុទ្ធគ្នាជាងបីឆ្នាំ។
 
ហើយទាំងលោក Zelensky និងលោក Putin បានយល់ព្រមលើបទឈប់បាញ់ដែលជាគោលការណ៍ក្នុងអំឡុងពេលសន្ទនាជាមួយសហរដ្ឋអាមេរិក ប៉ុន្តែមិនទាន់សម្រេចបាននៅឡើយទេ ដោយសារលក្ខខណ្ឌជម្លោះ។