លោក Volodymyr Zelensky បាននិយាយថា មន្ត្រីអ៊ុយក្រែននិងសហរដ្ឋអាមេរិកនឹងជួបចរចាសន្តិភាពនៅប្រទេសអារ៉ាប៊ីសាអូឌីត នាថ្ងៃចន្ទសប្តាហ៍ក្រោយ បន្ទាប់ពីវិមានក្រឹមឡាំង បានបញ្ជាក់ពីការចរចារវាងសហរដ្ឋអាមេរិក និងរុស្ស៊ី។ 

ស្របគ្នានោះដែរមេដឹកនាំអ៊ុយក្រែនរូបនេះបានបញ្ជាក់ថា ប្រធានាធិបតីរុស្ស៊ីលោក វ្ល៉ាឌីមៀ ពូទីន «ត្រូវតែបញ្ឈប់ការទាមទារដែលមិនចាំបាច់ ដែលគ្រាន់តែជាការចង់អូសបន្លាយសង្គ្រាម»។ 

ហើយចំពោះការទាមទាររបស់ទីក្រុងម៉ូស្គូ រួមមានទាំងការបញ្ចប់ទាំងស្រុងនូវជំនួយយោធាសម្រាប់អ៊ុយក្រែន។ បន្ថែមពីនេះ លោក Zelensky ក៏បានព្រមានផងដែរថា ការដកសមាជិកភាពណាតូសម្រាប់អ៊ុយក្រែន ដែលជាអ្វីដែលលោកពូទីនបាននិយាយថាមិនអាចចរចារបានសម្រាប់សន្តិភាពនឹងក្លាយជា "អំណោយដ៏ធំដល់រុស្ស៊ី"។ 

លើសពីនេះប្រធានាធិបតីរូបនេះ ក៏បានច្រានចោលការអះអាងរបស់សេតវិមានដែលថាលោកបានពិភាក្សាលើការប្រគល់កម្មសិទ្ធិនៃរោងចក្រថាមពលនុយក្លេអ៊ែររបស់អ៊ុយក្រែនទៅឱ្យសហរដ្ឋអាមេរិកក្នុងអំឡុងពេលការហៅទូរស័ព្ទជាមួយប្រធានាធិបតី Donald Trump ទៀតផង។

គួរជម្រាបឲ្យដឹងថា កិច្ចពិភាក្សាចុងក្រោយនេះ បានកើតឡើងនៅពេលដែលសហរដ្ឋអាមេរិក ព្យាយាមធ្វើអន្តរាគមលើបទឈប់បាញ់រវាងប្រទេសទាំងពីរបន្ទាប់ពីមានការប្រយុទ្ធគ្នាជាងបីឆ្នាំកន្លងមក។ 

ទាំងលោក Zelensky និងលោក Putin បានយល់ព្រមលើបទឈប់បាញ់ជាគោលការណ៍ក្នុងអំឡុងពេលសន្ទនាជាមួយសហរដ្ឋអាមេរិក ប៉ុន្តែនៅមិនទាន់សម្រេចបាននៅឡើយទេ ដោយសារតែលក្ខខណ្ឌជម្លោះ។

ហើយបន្ទាប់ពីកិច្ចសន្ទនានេះមក មេដឹកនាំរុស្ស៊ីនាពេលថ្មីៗនេះបានយល់ព្រមបញ្ឈប់ការវាយប្រហារតាមអាកាសលើហេដ្ឋារចនាសម្ព័ន្ធថាមពល ប៉ុន្តែការវាយប្រហារបែបនេះពីភាគីទាំងពីរនៅតែបន្ត បើទោះបីជាមានការព្រមព្រៀងគ្នាយ៉ាងណាក៏ដោយ។

លោក Zelensky បាននិយាយថា គណៈប្រតិភូអ៊ុយក្រែននឹងប្រគល់ឱ្យសហរដ្ឋអាមេរិកនូវបញ្ជីហេដ្ឋារចនាសម្ព័ន្ធ ដែលខ្លួនចង់ការពារពីការវាយប្រហាររបស់រុស្ស៊ីនៅក្នុងកិច្ចពិភាក្សាកាលពីថ្ងៃចន្ទ។
 
ហើយនៅពេលសួរថា តើគាត់បានត្រៀមខ្លួនរួចរាល់ហើយក្នុងការធ្វើសម្បទានទឹកដីឱ្យរុស្ស៊ី ជាពិសេសនៅ Crimea ដែលស្ថិតនៅក្នុងដៃរុស្ស៊ីតាំងពីឆ្នាំ 2014 នោះ Zelensky បាននិយាយថា "នោះគឺជាឧបទ្វីបអ៊ុយក្រែន" ដោយលោកបន្ថែមថា Crimea គឺជា "ផ្នែកសំខាន់" នៃប្រទេសរបស់គាត់។ Crimea ត្រូវបានទទួលស្គាល់ជាអន្តរជាតិថាជាផ្នែកនៃអ៊ុយក្រែន បើទោះបីជារុស្ស៊ីកាន់កាប់ និងទាមទារជាឧបសម្ព័ន្ធយ៉ាងណាក៏ដោយ។

នៅពេលសួរថាតើបទឈប់បាញ់អាចមើលទៅដូចអ្វី លោក Zelensky បាននិយាយថា ដំណាក់កាលដំបូងត្រូវតែជាបទឈប់បាញ់តាមផ្លូវគោក និងសមុទ្រ ព្រោះអ៊ុយក្រែនមើលឃើញថានេះជាមធ្យោបាយតែមួយគត់ដើម្បីបញ្ឈប់ការឈ្លានពានរបស់រុស្ស៊ី។

រីឯអនុរដ្ឋមន្ត្រីការបរទេសរុស្ស៊ីលោក Alexander Grushko បាននិយាយនៅដើមសប្តាហ៍នេះថា ទីក្រុងមូស្គូនឹងស្វែងរកការធានាថា ណាតូនឹងដកអ៊ុយក្រែនចេញពីសមាជិកភាព ហើយថាអ៊ុយក្រែននឹងរក្សាអព្យាក្រឹតក្នុងកិច្ចព្រមព្រៀងសន្តិភាពណាមួយ។

ផ្ទុយពីនេះ ថ្លែងទៅកាន់មេដឹកនាំសហភាពអឺរ៉ុបតាមរយៈតំណភ្ជាប់វីដេអូនៅឯកិច្ចប្រជុំនៅទីក្រុងប្រ៊ុចសែល លោក Zelensky បានរំលឹកឡើងវិញនូវការអំពាវនាវឱ្យមានជំនួយយោធាបន្ត ដោយស្នើថវិកាចំពោះមេដឹកនាំអឺរ៉ុបយ៉ាងហោចណាស់ចំនួន 5 ពាន់លានអឺរ៉ូ សម្រាប់គ្រាប់កាំភ្លើងធំ "ឱ្យបានឆាប់តាមដែលអាចធ្វើទៅបាន" ហើយបាននិយាយថាការបន្តការគាំទ្រសម្រាប់អ៊ុយក្រែនគឺ "មានសារៈសំខាន់" ។