ថៃ (សិល្បៈ) ៖ ចំពោះបងប្អូនដែលនិយមតាមដានរឿងភាគថៃ ពិតជាបានស្គាល់តារាស្រី ឌីវ អារីសសារ៉ា ហើយ ដែលភាគច្រើនតារាស្រីរូបនេះ ច្រើនតែសម្ដែងជាតួកាច ឆ្នាស់នៅក្នុងរឿងភាគថៃ។ ឌីវ ជាតារាស្រីមួយរូបដែលបានចូលរួមសម្ដែងនូវរឿងភាគថៃល្បីៗជាច្រើន ហើយចំណែកឯចំណូលដែល ឌីវ រកបានពីការសម្ដែងនេះវិញ ក៏ត្រូវបានគេប៉ាន់ស្មានថាទទួលបានចំណូលយ៉ាងច្រើនពីការសម្ដែងរបស់នាងផងដែរ។ បើក្រឡេកទៅមើលពីជីវិតក្រៅសាច់រឿងរបស់តារាស្រីរូបនេះ ត្រូវបានគេដឹងថា នាងជាតារាស្រីមួយរូបដែលមានស្ទើរតែគ្រប់បែបយ៉ាង រហូតធ្វើឲ្យប្រិយមិត្តដែលនិយមតាមដាននាងមានការស្ងើចសរសើរយ៉ាងខ្លាំងពីជីវិតក្រៅសាច់រឿងរបស់នាង ដោយសង្សាររបស់ ឌីវ ភាគច្រើនគឺសុទ្ធតែជាហាយសូលំដាប់ទាំងអស់។ 

មិនតែប៉ុណ្ណោះ ឌីវ អារីសសារ៉ា ក៏បានរៀបការជាមួយស្វាមីដែលជាអ្នកមាន ចិន-តៃវ៉ាន់ ម្នាក់ ដែលជាអ្នកមានហាយសូ មិនចាញ់អតីតសង្សារមុនៗរបស់នាងប៉ុន្មាននោះទេ។ ក្រោយរៀបការរួច គេសង្កេតឃើញតារាស្រីរូបនេះ នៅតែបន្តផុសបង្ហាញពីជីវិតហាយសូរបស់ខ្លួននៅលើបណ្ដាញសង្គមជាហូរហែរឥតដាច់នោះឡើយ។ លើសពីនេះ ឌីវ ជាតារាស្រីម្នាក់ដែលទិញក៏ដូចជាប្រើប្រាស់នូវសម្ភារៈផ្ទាល់ខ្លួន ដែលមានតម្លៃថ្លៃៗជាច្រើនដែលយើងស្ទើរតែមិនគួរឲ្យជឿនោះទេ។ ដូចជាគ្រាន់តែតារាស្រីរូបនេះ ទៅលេងនិងស្នាក់នៅទីក្រុងប៉ារីសត្រឹមតែមួយយប់ប៉ុណ្ណោះ នាងបានចំណាយរហូតទៅដល់ជាង ពីរម៉ឺនដុល្លារ។ ហើយគ្រាន់តែដើរលេងបែបធម្មតាៗ ក៏តារាស្រីរូបនេះចំណាយរហូតទៅដល់រាប់ពាន់ដុល្លារផងដែរ។ លើសពីនេះ គ្រាន់តែទិញទឹកដោះគោឲ្យកូនរបស់ខ្លួន ឌីវ ហ៊ានចំណាយរហូតទៅដល់មួយលានដុល្លារ ទៅសាំងហ្គាពួរ ដើម្បីទិញទឹកដោះគោឲ្យកូនរបស់នាង រួមទាំងបានចំណាយជាច្រើនលានដុល្លារទៀតក្នុងការជិះយន្តហោះផ្ទាល់ខ្លួនទៅក្រៅប្រទេសជាដើម។ បើនិយាយពីភាពមានបានរបស់តារាស្រីរូបនេះដែលបានចំណាយទៅលើជីវិតប្រចាំថ្ងៃរបស់នាង គឺរៀបរាប់មិនអស់នោះទេ។

ប៉ុន្តែផ្ទុយទៅវិញ នាពេលថ្មីៗនេះ តារាស្រីលំដាប់ហាយសូ ចាយលុយវាល់លានរូបនេះបែរជាមានផ្ទុះនូវរឿងអាស្រូវថា បានជំពាក់បំណុលក៏ដូចជាបានខ្ចីលុយពីអ្នកមានម្នាក់បែរជាមិនសងគេទៅវិញ។

គ្រាន់តែផ្ទុះនូវពាក្យចចាមអារ៉ាមនេះភ្លាម មហាជនដែលនិយមតាមដានជីវិតហាយសូរបស់តារាស្រី ឌីវ ស្ទើរតែមិនគួរឲ្យជឿ និងមានជាការហួសចិត្តយ៉ាងខ្លាំងព្រោះភាគច្រើនពួកគេឃើញតែតារាស្រីរូបនេះ ផុស update ពីជីវិតហាយសូរបស់នាងពីមួយថ្ងៃទៅមួយថ្ងៃនៅលើបណ្ដាញសង្គមមិនឈប់ឈរនោះឡើយ។

បន្ទាប់ពីផ្ទុះនូវព័ត៌មានខ្សឹបខ្សៀវនេះមួយរយៈ គេមិនទាន់បានឃើញតារាស្រីរូបនេះចេញមកបកស្រាយអ្វីនោះឡើយ។ ប៉ុន្តកាលពីថ្ងៃទី ១៩ ខែមីនា កន្លងទៅថ្មីៗនេះ រឿងតារាស្រីហាយសូរូបនេះ ក៏មានការផ្ទុះឡើងជាថ្មី ដោយសារតែភាគីម្ខាងទៀតដែលជាម្ចាស់បំណុលរបស់ ឌីវ អារីសសារ៉ា បានឡើងមកកាន់កម្មវិធីមួយនៅថៃ រួចក៏បានធ្វើការបកស្រាយពីដំណើរដើមទងដែលតារាស្រីរូបនេះ បានមកសូមខ្ចីរបស់របរក៏ដូចជាគ្រឿងអលង្ការដែលមានតម្លៃរាប់លានរបស់ខ្លួន ហើយមិនបានឃើញតារាស្រីរូបនេះយកមកសងវិញនោះទេ។ ហើយរឿងរ៉ាវពិតក៏ត្រូវបានលាតត្រដាងឡើង ដោយអ្នកដែលឲ្យ តារាស្រីហាយសូ ឌីវ ខ្ចីគ្រឿងអលង្ការហូតដល់មានតម្លៃរាប់ពាន់លានដុល្លារនោះ ឈ្មោះថា មេ (May) ដែលជាអ្នកមាននិងជាអ្នកជំនួញដ៏ជោគជ័យម្នាក់នៅក្នុងចំណោមអ្នកជំនួញដ៏មានអំណាចជាច្រើននៅប្រទេសថៃ។ ក្នុងនោះ អ្នកជំនួញវាល់លានម្នាក់នេះបានឲ្យដឹងថា ឌីវ បានមកទាក់ទងសូមខ្ចីលុយខ្លួនដើម្បីយកទៅសង យូធូបប៊ឺវីយក្មេងដែលល្បីឈ្មោះម្នាក់នៅប្រទេសថៃ ដំបូងម្ចាស់ក្រុមហ៊ុនដែលមានជំនួញវាល់លានម្នាក់នេះមិនបានឲ្យ ឌីវ ខ្ចីនោះទេ តែដោយ ឌីវ នៅតែទទូចម្ដងហើយម្ដងទៀតខ្លួនក៏បានឲ្យដូចជា កាបូប ខ្សែក និងត្បូងមរតក ដែលមានតម្លៃរាប់លានបាតឲ្យតារាស្រីរូបនេះយកទៅតម្កល់ជាមួយ ធូយូបប៊ឺវ័យក្មេងរូបនេះ។ តែផ្ទុយទៅវិញ ឌីវ បែរជាយករបស់ទាំងនោះទៅបញ្ចាំងទៅវិញ ហើយបែរជាគេចវេសមិនព្រមសារភាពតាមត្រង់នូវទង្វើដែលខ្លួនបានធ្វើនោះទេ។ នៅពេលដែលបែកធ្លាយនូវរឿងរ៉ាវដែលនៅពីក្រោយតារាហាយសូរូបនេះ ក៏មាននូវការបែកធ្លាយជាបន្តបន្ទាប់ទៀត ពាក់ព័ន្ធនឹងរឿងបំណុលដែលនាងបានជំពាក់អ្នកផ្សេងៗទៀតរាប់លានដុល្លារដូចគ្នា ហើយចំណែកឯខុនដូ ក៏ដូចជាឡានដែលនាងអះអាងថាទិញដោយខ្លួនឯង និងមានតម្លៃថ្លៃកប់ពពកនោះ ការពិតគឺជាការជួលមកថតដើម្បីបង្ហាញលើបណ្ដាញសង្គមប៉ុណ្ណោះ។ ស្របគ្នានេះដែរ តារាស្រីរូបនេះក៏បានព្រមសារភាពទាំងទឹកភ្នែកហូរជោគថ្ពាល់ថា ខ្លួនពិតជាបានជំពាក់បំណុលគេជុំទិសបែបនេះពិតមែនគឺដោយសារតែការចាយក៏ដូចជាចំណាយលើសពីសមត្ថភាព ដែលខ្លួនមានទើបបានជា

ត្រូវខ្ចីលុយគេ និងជំពាក់បំណុលគេជុំទិសបែបនេះ។ ហើយនាងក៏បានធ្វើការសុំទោសទាំងទឹកភ្នែក និងបានបន្ថែមថា ទង្វើដែលនាងបានធ្វើនេះគឺជាទង្វើដែលមិនគួរយកគម្រូតាមឡើយ។
តើបងប្អូនយល់យ៉ាងណាដែរ បន្ទាប់ពីបានដឹងពីជីវិតពិតដែលលាក់ពីក្រោយតារាស្រីហាយសូរូបនេះ?