មន្ត្រីអាមេរិកម្នាក់បានបញ្ជាក់ថា រដ្ឋបាល Trump គ្រោងនឹងនាំចូលស៊ុតពីប្រទេសទួរគី និងកូរ៉េខាងត្បូង ហើយកំពុងពិភាក្សាជាមួយប្រទេសផ្សេងទៀតក្នុងក្តីសង្ឃឹមថានឹងមានការបន្ធូរបន្ថយតម្លៃខ្ពស់គ្រប់ពេលវេលាសម្រាប់អ្នកប្រើប្រាស់អាមេរិក។ 

ការដែលអាមេរិកគ្រោងនឹងធ្វើបែបនេះ ក៏ព្រោះតែបណ្ដាលមកពីការរីករាលដាលនៃជំងឺគ្រុនផ្ដាសាយបក្សីដែលបានបង្ខំកសិករអាមេរិក ឲ្យសម្លាប់សត្វមាន់របស់ពួកគេរាប់សិបលានក្បាល។ហើយចំពោះការគ្រោងនឹងនាំចូលស៊ុតនេះ បើតាមការប្រកាសរបស់រដ្ឋបាល ត្រាំ វាអាចត្រូវបានចំណាយ ១ពាន់លានដុល្លារ។

ហើយទោះបីជាយុទ្ធនាការរបស់លោកប្រធានាធិបតី Trump សន្យាថានឹងកាត់បន្ថយតម្លៃយ៉ាងណាក៏ដោយ ក៏តម្លៃស៊ុតបានកើនឡើងច្រើនជាង 65% ក្នុងឆ្នាំកន្លងទៅនិងត្រូវបានគេព្យាករណ៍ថានឹងកើនឡើង 41% នៅឆ្នាំ 2025។

គួរបញ្ជាក់ថា កាលពីខែកុម្ភៈ កន្លងទៅនេះ ក្រសួងកសិកម្មសហរដ្ឋអាមេរិកបានបង្ហាញផែនការចំនួន 1ពាន់លានដុល្លារ ដែលមានចំនួន 5ចំណុចដើម្បីដោះស្រាយតម្លៃស៊ុតនៅលើទីផ្សារ ដោយមានថវិកា 500 លានដុល្លារសម្រាប់វិធានការជីវសុវត្ថិភាព និងប្រហែល 100 លានដុល្លារសម្រាប់ការស្រាវជ្រាវ ក៏ដូចជាអភិវឌ្ឍន៍វ៉ាក់សាំង និង 400 លានដុល្លារទៀតសម្រាប់កម្មវិធីជំនួយហិរញ្ញវត្ថុរបស់កសិករផងដែរ។ 

បើទោះបីជាជំងឺគ្រុនផ្តាសាយបក្សី ឬ H5N1 បានរីករាលដាលក្នុងចំណោមហ្វូងបសុបក្សីអាមេរិកអស់ជាច្រើនឆ្នាំយ៉ាងណាក៏ដោយ ប៉ុន្តែការផ្ទុះឡើងដែលចាប់ផ្តើមនៅឆ្នាំ 2022 បានបំផ្លាញកសិដ្ឋានរបស់កសិករអាមេរិកដោយបានសម្លាប់សត្វបក្សីជាង 156 លានក្បាល និងតម្លៃពងមាន់កើនឡើងយ៉ាងខ្លាំងផងដែរ។