តូរ៉ុនតូ៖ នាយករដ្ឋមន្រ្តីលោក Mark Carney នៅថ្ងៃសុក្រ កាលពីម្សិលមិញនេះ បាននិយាយថា ប្រទេសកាណាដាអាចទូទាត់ផលប៉ះពាល់នៃពន្ធគយណាមួយរបស់សហរដ្ឋអាមេរិក ដោយដកចេញនូវរបាំងពាណិជ្ជកម្មផ្ទៃក្នុង និងបានបន្តថាលោកមានបំណងធ្វើពាណិជ្ជកម្មសេរីនៅក្នុងប្រទេសត្រឹមថ្ងៃទី 1 ខែកក្កដា ខាងមុខនេះ បន្ទាប់ពីបានជួបមេដឹកនាំខេត្តនិងមេដឹកនាំដែនដី។

នាយករដ្ឋមន្រ្តីកាណាដា បានបញ្ជាក់នៅលើគេហទំព័ររបស់គាត់ដោយបានដកស្រង់ការស្រាវជ្រាវដែលបានរកឃើញថា ការដករបាំងផ្ទៃក្នុងនឹងកាត់បន្ថយថ្លៃដើមពាណិជ្ជកម្មរហូតដល់ 15% និងចំណាយសេដ្ឋកិច្ចចន្លោះពី 4% ទៅ 8% ។ 

លោកបានបន្តថា មានវិធីសាស្ត្រសំខាន់ចំនួនបីក្នុងការធ្វើកិច្ចការនេះ គឺការចុះសម្រុងគ្នាលើបទប្បញ្ញត្តិទូទាំងខេត្ត ការទទួលស្គាល់គ្នាទៅវិញទៅមករបស់ខេត្តនិងការបង្កើតស្តង់ដារជាតិរួម។

ទាក់ទងនឹងបញ្ហាពន្ធគយ ក្រុមធុរកិច្ចបានត្អូញត្អែរជាយូរណាស់មកហើយអំពីរបាំងពាណិជ្ជកម្មក្នុងចំណោមខេត្តទាំង 10 និងដែនដីចំនួន 3 ក៏ដូចជាដំណើរការអនុញ្ញាតឱ្យចេញដែលមានន័យថាវាអាចចំណាយពេលច្រើនឆ្នាំដើម្បីអភិវឌ្ឍ និងសាងសង់អណ្តូងរ៉ែ បំពង់បង្ហូរប្រេង និងគម្រោងធនធានសំខាន់ៗផ្សេងទៀត។

គួរបញ្ជាក់ឲ្យដឹងថា ប្រធានាធិបតីអាមេរិកលោក Donald Trump បានដាក់ពន្ធ 25% លើការនាំចូលដែកថែប និងអាលុយមីញ៉ូមរបស់កាណាដាក្នុងខែមីនា ជាមួយនឹងពន្ធបន្ថែមនឹងបន្តនៅថ្ងៃទី 2 ខែមេសាខាងមុខបន្តទៀត។

ប្រទេសកាណាដាបានបញ្ជូន 75% នៃការនាំចេញទៅកាន់សហរដ្ឋអាមេរិក ហើយមួយភាគបីនៃការនាំចូលទាំងអស់បានមកពីប្រទេសជិតខាងភាគខាងត្បូងរបស់ខ្លួន ដែលទុកឱ្យសេដ្ឋកិច្ចរបស់ខ្លួនងាយរងគ្រោះដោយសារសង្គ្រាមពាណិជ្ជកម្មអូសបន្លាយ។