ក្រុងគែរ៖ ការវាយប្រហារតាមអាកាសរបស់អ៊ីស្រាអែលនៅតំបន់ហ្គាហ្សាភាគខាងត្បូង Khan Younis បានសម្លាប់មេដឹកនាំនយោបាយក្រុមហាម៉ាស់ Salah al-Bardaweel នាថ្ងៃអាទិត្យ ខណៈដែលអ្នកស្រុកបានរាយការណ៍ពីការកើនឡើងនៅក្នុងយុទ្ធនាការយោធាអ៊ីស្រាអែលដែលបានចាប់ផ្តើមកាលពីថ្ងៃអង្គារកន្លងទៅ។

ប្រព័ន្ធផ្សព្វផ្សាយគាំទ្រហាម៉ាសបាននិយាយថា ការវាយប្រហារតាមអាកាសបានសម្លាប់លោក Bardaweel ដែលជាសមាជិកការិយាល័យនយោបាយរបស់ក្រុមនេះ ហើយក៏បានសម្លាប់ប្រពន្ធរបស់គាត់ផងដែរ។

ការបំផ្ទុះបានបន្លឺឡើងនៅទូទាំងភាគខាងជើង កណ្តាល និងភាគខាងត្បូង Gaza Strip នៅព្រឹកព្រលឹមថ្ងៃអាទិត្យនេះ ខណៈដែលយន្តហោះអ៊ីស្រាអែលបានវាយប្រហារគោលដៅជាច្រើននៅក្នុងតំបន់ទាំងនោះ។

នៅក្នុងសេចក្តីថ្លែងការណ៍មួយ ក្រុមហាម៉ាស់បានចោទប្រកាន់អ៊ីស្រាអែលពីបទធ្វើឃាតលោក Bardaweel។

រីឯនាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយម្តងហើយម្តងទៀតថា គោលបំណងសំខាន់នៃសង្រ្គាម គឺដើម្បីបំផ្លាញក្រុមហាម៉ាស ដែលជាអង្គភាពយោធានិងជាអង្គភាពគ្រប់គ្រង។ 

លោកបាននិយាយថា គោលបំណងនៃយុទ្ធនាការថ្មីនេះ គឺដើម្បីបង្ខំក្រុមនេះឲ្យបោះបង់ចំណាប់ខ្មាំងដែលនៅសេសសល់។ 

ប៉ុន្តែប្រមុខរដ្ឋាភិបាលនៃក្រុមហាម៉ាសលោក Essam Addalees និងប្រធានសន្តិសុខផ្ទៃក្នុងលោក Mahmoud Abu Watfa ក៏ស្ថិតក្នុងចំណោមអ្នកដែលត្រូវបានសម្លាប់ដោយការវាយប្រហាររបស់អ៊ីស្រាអែលដែរកាលពីថ្ងៃអង្គារ បន្ថែមពីលើមន្ត្រីជាច្រើនផ្សេងទៀត។

មន្ត្រីសុខាភិបាលប៉ាឡេស្ទីនបាននិយាយថា យ៉ាងហោចណាស់មនុស្ស ៤០០នាក់ ដែលភាគច្រើនគឺជាស្ត្រី និងកុមារ ត្រូវបានសម្លាប់កាលពីថ្ងៃអង្គារកន្លងទៅនេះ។
 
ក្រុមគ្រូពេទ្យប៉ាឡេស្ទីនបាននិយាយថា យន្តហោះអ៊ីស្រាអែលមួយគ្រឿងបានទម្លាក់គ្រាប់បែកលើផ្ទះមួយក្នុងទីក្រុង Rafah ភាគខាងត្បូង Gaza Strip ដោយបានបណ្តាលឲ្យមនុស្សជាច្រើននាក់រងរបួស។ 

ហើយក្រុមហាម៉ាស់បានចោទប្រកាន់អ៊ីស្រាអែលថាបានរំលោភលើលក្ខខណ្ឌនៃកិច្ចព្រមព្រៀងបទឈប់បាញ់កាលពីខែមករា ដោយបដិសេធមិនចាប់ផ្តើមការចរចាសម្រាប់ការបញ្ចប់សង្គ្រាមចុងក្រោយ និងការដកទ័ពរបស់ខ្លួនចេញពីតំបន់ហ្គាហ្សានោះទេ។ 

ការវិលត្រឡប់ទៅកាន់ការវាយប្រហារតាមអាកាសនិងប្រតិបត្តិការជើងគោក ដែលបានបំផ្លិចបំផ្លាញតំបន់ហ្គាហ្សា បានទាក់ទាញការអំពាវនាវឱ្យមានបទឈប់បាញ់ពីបណ្តាប្រទេសអារ៉ាប់ និងអឺរ៉ុប។ 

ចំណែក អង់គ្លេស បារាំង និងអាល្លឺម៉ង់ក៏បានចេញសេចក្តីថ្លែងការណ៍រួមមួយ ដោយបានអំពាវនាវឱ្យអ៊ីស្រាអែលស្តារលទ្ធភាពទទួលបានជំនួយមនុស្សធម៌។

គួរបញ្ជាក់ឲ្យដឹងថា អ៊ីស្រាអែលបានចាប់ផ្តើមយុទ្ធនាការរបស់ខ្លួននៅតំបន់ហ្គាហ្សា បន្ទាប់ពីការវាយប្រហារដ៏សាហាវរបស់ពួកហាម៉ាស លើសហគមន៍អ៊ីស្រាអែលជុំវិញតំបន់ហ្គាហ្សាស្ទ្រីបកាលពីថ្ងៃទី 7 ខែតុលា ឆ្នាំ 2023 ដែលបានសម្លាប់មនុស្សប្រហែល 1,200 នាក់ នេះបើយោងតាមចំនួនសរុបរបស់អ៊ីស្រាអែល មនុស្សចំនួន 251 នាក់ត្រូវបានចាប់ពង្រត់ធ្វើជាចំណាប់ខ្មាំង។

យោងតាមអាជ្ញាធរសុខាភិបាលប៉ាឡេស្ទីន យុទ្ធនាការរបស់អ៊ីស្រាអែលបានសម្លាប់ប្រជាជនប៉ាឡេស្ទីនជាង 49,000 នាក់ និងបានបំផ្លិចបំផ្លាញតំបន់ឆ្នេរជាច្រើន ដោយបន្សល់ទុកមនុស្សរាប់សែននាក់នៅក្នុងតង់ និងជម្រកបណ្តោះអាសន្ន។