វេណេហ្ស៊ុយអេឡានឹងបន្តជើងហោះហើរឡើងវិញ សម្រាប់ជនជាតិរបស់ខ្លួនដែលត្រូវបាននិរទេសដោយសហរដ្ឋអាមេរិក បន្ទាប់ពីបានឈានដល់កិច្ចព្រមព្រៀងជាមួយរដ្ឋបាល Trump ។

វេណេហ្ស៊ុយអេឡា ដែលមិនមានទំនាក់ទំនងការទូតជាមួយអាមេរិកបានយល់ព្រមជាលើកដំបូងក្នុងការទទួលយកជននិរទេសនៅក្នុងខែកុម្ភៈកន្លងទៅនេះ។ 

ប៉ុន្តែប្រធានាធិបតី Nicolás Maduro បានផ្អាកជើងហោះហើរក្នុងខែមីនា បន្ទាប់ពីមានជម្លោះជាមួយរដ្ឋបាល Trump ដោយសារតែក្រសួងរតនាគារសហរដ្ឋអាមេរិកបានផ្អាកការអនុញ្ញាតពីក្រុមហ៊ុនថាមពលយក្ស Chevron ក្នុងការនាំចេញប្រេងពីប្រទេសវេណេហ្ស៊ុយអេឡា។ 

លោក Maduro បាននិយាយនៅក្នុងសុន្ទរកថាតាមទូរទស្សន៍កាលពីថ្ងៃសៅរ៍ថា"ថ្ងៃស្អែកដោយសារការតស៊ូរបស់រដ្ឋាភិបាលយើងនឹងបន្តជើងហោះហើរដើម្បីបន្តជួយសង្គ្រោះ និងដោះលែងជនចំណាកស្រុកពីពន្ធនាគារក្នុងសហរដ្ឋអាមេរិក" ។

កាលពីថ្ងៃទី 15 ខែមីនា រដ្ឋបាល Trump បាននិរទេសជនជាតិវេណេស៊ុយអេឡាចំនួន 238 នាក់ ដែលពួកគេត្រូវបានចោទប្រកាន់ថាជាក្រុមក្មេងទំនើង Tren de Aragua ទៅកាន់ប្រទេស El Salvador ជាកន្លែងដែលពួកគេត្រូវបានគេឃុំខ្លួននៅក្នុងពន្ធនាគារដ៏ធំ។

លោក Trump បានប្រើប្រាស់ច្បាប់ Alien Enemies Act ឆ្នាំ 1798 ជាមូលដ្ឋានច្បាប់សម្រាប់ការដកអ្នកនិរទេសវេណេស៊ុយអេឡាចំនួន 137 នាក់ចេញ ដែលបណ្តាលឱ្យមានការប្រឈមផ្នែកច្បាប់ភ្លាមៗ។ 

ហើយសេតវិមានបានប្រឈមមុខនឹងការចោទប្រកាន់ពីបទប្រឆាំងនឹងដីការបស់ចៅក្រមដែលខ្លួនបដិសេធ។