អ៊ីស្រាអែល៖ រដ្ឋាភិបាលអ៊ីស្រាអែលបានអនុម័តបទឈប់បាញ់ថ្មីនៅតំបន់ហ្គាហ្សា និងកិច្ចព្រមព្រៀងដោះលែងចំណាប់ខ្មាំងជាមួយក្រុមហាម៉ាស ដោយបើកផ្លូវឱ្យចូលជាធរមាននៅថ្ងៃអាទិត្យ នេះ។ ការសម្រេចនេះបានធ្វើឡើងបន្ទាប់ពីការពិភាក្សាជាច្រើនម៉ោងដែលបានបន្តរហូតដល់យប់ជ្រៅ។ 

គណៈរដ្ឋមន្ត្រីសន្តិសុខមុននេះ បានផ្តល់អនុសាសន៍ឱ្យផ្តល់សច្ចាប័នលើកិច្ចព្រមព្រៀងនេះ ដោយនិយាយថាវា "គាំទ្រដល់ការសម្រេចបាននូវគោលបំណងនៃសង្គ្រាម" នេះបើយោងតាមការិយាល័យរបស់នាយករដ្ឋមន្ត្រី Benjamin Netanyahu ។ 

ការផ្ដល់អនុសាសន៍នេះ បានកើតឡើងប៉ុន្មានម៉ោងបន្ទាប់ពីការិយាល័យនាយករដ្ឋមន្ត្រី និងក្រុមហាម៉ាសទាំងពីរបាននិយាយថា ពួកគេបានបញ្ចប់ព័ត៌មានលម្អិតនៃកិច្ចព្រមព្រៀងនេះ ពីរថ្ងៃបន្ទាប់ពីវាត្រូវបានប្រកាសដោយអ្នកសម្រុះសម្រួលកាតា សហរដ្ឋអាមេរិក និងអេហ្ស៊ីប។

នៅក្រោមកិច្ចព្រមព្រៀងនេះ ចំណាប់ខ្មាំងអ៊ីស្រាអែលចំនួន 33 នាក់នៅតែត្រូវបានក្រុមហាម៉ាសនៅហ្គាហ្សាឃុំខ្លួនបន្ទាប់ពីជម្លោះរយៈពេល 15 ខែនឹងត្រូវបានផ្លាស់ប្តូរសម្រាប់អ្នកទោសប៉ាឡេស្ទីនរាប់រយនាក់នៅក្នុងគុកអ៊ីស្រាអែល ក្នុងដំណាក់កាលដំបូងដែលមានរយៈពេលប្រាំមួយសប្តាហ៍។ 

ហើយកងកម្លាំងអ៊ីស្រាអែលក៏នឹងដកខ្លួនចេញពីតំបន់ដែលមានប្រជាជនច្រើននៃតំបន់ហ្គាហ្សា ប្រជាជនប៉ាឡេស្ទីនដែលត្រូវបានផ្លាស់ទីលំនៅនឹងត្រូវបានអនុញ្ញាតឱ្យចាប់ផ្តើមត្រឡប់ទៅផ្ទះរបស់ពួកគេវិញ ហើយឡានជំនួយរាប់រយគ្រឿងនឹងត្រូវបានអនុញ្ញាតឱ្យចូលទៅក្នុងទឹកដីជារៀងរាល់ថ្ងៃ។

ចំពោះការចរចាសម្រាប់ដំណាក់កាលទីពីរ ដែលគួរតែឃើញចំណាប់ខ្មាំងដែលនៅសេសសល់ត្រូវបានដោះលែង ការដកទ័ពអ៊ីស្រាអែលពេញលេញ និង "ការស្ដារឡើងវិញនូវភាពស្ងប់ស្ងាត់ប្រកបដោយនិរន្តរភាព" នឹងចាប់ផ្តើមនៅថ្ងៃទី 16 ។

សម្រាប់ដំណាក់កាលទីបី និងចុងក្រោយគឺមានការទាក់ទងនឹងការកសាងតំបន់ហ្កាហ្សាឡើងវិញ ដែលជាអ្វីដែលអាចចំណាយពេលរាប់ឆ្នាំ និងការប្រគល់សាកសពចំណាប់ខ្មាំងដែលនៅសេសសល់មកវិញផងដែរ។

ប្រទេសកាតាបាននិយាយថា ចំណាប់ខ្មាំងដែលត្រូវដោះលែងក្នុងដំណាក់កាលដំបូងនឹងរួមមាន "ស្ត្រីស៊ីវិល ទាហានស្ត្រី កុមារ មនុស្សចាស់ និងជនស៊ីវិលដែលឈឺ និងរបួស"។

យោធាអ៊ីស្រាអែលបានចាប់ផ្តើមយុទ្ធនាការមួយដើម្បីកម្ទេចក្រុមហាម៉ាស់ ដែលត្រូវបានចាត់ទុកថាជាអង្គការភេរវករដោយអ៊ីស្រាអែល សហរដ្ឋអាមេរិក និងប្រទេសដទៃទៀត ជាការឆ្លើយតបទៅនឹងការវាយប្រហារឆ្លងព្រំដែន ដែលមិនធ្លាប់មានពីមុនមកកាលពីថ្ងៃទី 7 ខែតុលា ឆ្នាំ 2023 ដែលក្នុងនោះមនុស្សប្រហែល 1,200 នាក់បានស្លាប់ និង 251 នាក់ត្រូវបានចាប់ធ្វើជាចំណាប់ខ្មាំង។ 

ចាប់តាំងពីពេលនោះមក មនុស្សជាង 46.870 នាក់ត្រូវបានសម្លាប់នៅហ្គាហ្សា នេះបើយោងតាមក្រសួងសុខាភិបាលដែលគ្រប់គ្រងដោយក្រុមហាម៉ាសរបស់ដែនដីបានបញ្ជាក់។ 

ភាគច្រើននៃចំនួនប្រជាជន 2.3 លាននាក់ក៏ត្រូវបានផ្លាស់ទីលំនៅ និងមានការខ្វះខាតស្បៀងអាហារ ប្រេងឥន្ធនៈ ឱសថ និងទីជម្រកយ៉ាងធ្ងន់ធ្ងរដោយសារតែការតស៊ូដើម្បីទទួលបានជំនួយដល់អ្នកដែលត្រូវការជំនួយ។

អ៊ីស្រាអែលនិយាយថា ចំណាប់ខ្មាំង 94 នាក់នៅតែត្រូវបានក្រុមហាម៉ាស់ចាប់ខ្លួនដែលក្នុងនោះ 34 នាក់ត្រូវបានគេសន្មត់ថាបានស្លាប់។ 

លើសពីនេះទៀត មានជនជាតិអ៊ីស្រាអែលបួននាក់ដែលត្រូវបានគេចាប់ពង្រត់មុនសង្គ្រាមក្នុងនោះ ពីរនាក់បានស្លាប់។

ទាក់ទងនឹងការបោះឆ្នោតរបស់រដ្ឋាភិបាល ត្រូវបានគេរំពឹងទុកថានឹងប្រព្រឹត្តទៅនៅថ្ងៃព្រហស្បតិ៍ប៉ុន្តែកិច្ចប្រជុំត្រូវបានពន្យារពេលបន្ទាប់ពីលោក Netanyahu បានចោទប្រកាន់ក្រុមហាម៉ាស់ពីការបដិសេធទៅលើផ្នែកខ្លះនៃកិច្ចព្រមព្រៀង ។

ជាមួយគ្នានេះដែរ មន្ត្រីជាន់ខ្ពស់អេហ្ស៊ីបបានប្រាប់ BBC ថាកាលពីថ្ងៃសុក្រ លោកក៏បានជួបប្រជុំនៅទីក្រុងគែរ ដើម្បីពិភាក្សាអំពីយន្តការសម្រាប់ការអនុវត្តកិច្ចព្រមព្រៀងនេះផងដែរ។ 

មន្ត្រីរូបនេះបានបន្តថា ការរៀបចំចាំបាច់ទាំងអស់ត្រូវបានយល់ព្រម រួមទាំងការបង្កើតបន្ទប់ប្រតិបត្តិការរួមគ្នាមួយ ដើម្បីធានាបាននូវការអនុលោម ដែលនឹងរួមបញ្ចូលតំណាងអេហ្ស៊ីប កាតា សហរដ្ឋអាមេរិក ប៉ាឡេស្ទីន និងតំណាងអ៊ីស្រាអែល។