អាមេរិក៖ ប្រធានាធិបតីអាមេរិកលោក Donald Trump បានចុះហត្ថលេខាលើបទបញ្ជាប្រតិបត្តិមួយ ដើម្បីចាប់ផ្តើមដំណើរការដកសហរដ្ឋអាមេរិកចេញពីអង្គការសុខភាពពិភពលោក (WHO)។

ប្រធានាធិបតីអាមេរិក ដែលទើបចូលកាន់តំណែងថ្មីបាននិយាយខណៈដែលលោកបានអនុម័តលើឯកសារនេះបន្ទាប់ពីត្រឡប់មកដល់សេតវិមានវិញថា៖ «នោះជារឿងធំមួយ»។ វាជាសកម្មភាពប្រតិបត្តិមួយក្នុងចំណោមសកម្មភាពប្រតិបត្តិរាប់សិប ដែលលោកបានចុះហត្ថលេខានៅថ្ងៃទីមួយក្នុងតំណែងរបស់លោក។ ហើយនេះក៏ជាលើកទីពីរហើយដែរដែលលោក Trump បានបញ្ជាឲ្យដកអាមេរិកចេញពី អង្គការសុខភាពពិភពលោក (WHO) ។

ចំពោះហេតុផលដែលលោក Trump ធ្វើបែបនេះ ក៏ព្រោះតែលោកធ្លាប់បានរិះគន់ពីរបៀបដែលស្ថាប័នអន្តរជាតិដោះស្រាយបញ្ហាជំងឺរាតត្បាត Covid-19 ហើយបានចាប់ផ្តើមដំណើរការនៃការដកខ្លួនចេញពីស្ថាប័នដែលមានមូលដ្ឋាន នៅទីក្រុងហ្សឺណែវក្នុងអំឡុងពេលជំងឺរាតត្បាត។ ក្រោយមកប្រធានាធិបតី Joe Biden បានបដិសេធចំពោះការសម្រេចចិត្តនោះ។ 

ការអនុវត្តសកម្មភាពប្រតិបត្តិនេះនៅថ្ងៃដំបូង ទំនងជាសហរដ្ឋអាមេរិកអាចនឹងចាកចេញពីទីភ្នាក់ងារពិភពលោកជាផ្លូវការ។

ក្នុងនោះ លោក Trump បានធ្វើការចោទប្រកាន់ WHO ថាមានភាពលំអៀងចំពោះប្រទេសចិននៅក្នុងរបៀប ដែលខ្លួនបានចេញការណែនាំក្នុងអំឡុងពេលមានការផ្ទុះឡើងនូវជម្ងឺរាតត្បាត កូវីដ-១៩។

គួរបញ្ជាក់ថា ក្រោមការគ្រប់គ្រងរបស់លោក Biden សហរដ្ឋអាមេរិកបានបន្តជាអ្នកផ្តល់មូលនិធិដ៏ធំបំផុតរបស់ WHO ហើយនៅឆ្នាំ ២០២៣ អាមេរិកបានចូលរួមចំណែកស្ទើរតែមួយភាគប្រាំនៃថវិការបស់ទីភ្នាក់ងារនេះ។ ដោយថវិកាប្រចាំឆ្នាំរបស់អង្គការគឺ ៦.៨ ពាន់លានដុល្លារ (£5.5 billion)។
 
បន្ទាប់ពីលេចឮដមណឹងនេះ អ្នកជំនាញសុខភាពសាធារណៈបានរិះគន់ការសម្រេចចិត្តរបស់លោក Trump ក្នុងការចាកចេញពី WHO ដោយព្រមានថាវាអាចមានផលវិបាកដល់សុខភាពរបស់ជនជាតិអាមេរិក។ 

ដោយអ្នកខ្លះបានស្នើថា វិធានការនេះអាចបញ្ច្រាសការរីកចម្រើន ដែលបានធ្វើលើការប្រយុទ្ធប្រឆាំងនឹងជំងឺឆ្លងដូចជាគ្រុនចាញ់ របេង និងជំងឺអេដស៍ជាដើម។