បាងកក៖ ខ្យល់ពុល ត្រូវបានរាយការណ៍នៅក្នុងខេត្តចំនួន 70 ក្នុងចំណោមខេត្តចំនួន 77 នាថ្ងៃអង្គារនេះ ដោយមានការបំពុលបរិយាកាសដ៏អាក្រក់បំផុត ដែលត្រូវបានរកឃើញនៅក្នុងទីក្រុងបាងកក នេះបើតាមការចេញផ្សាយពីគេហទំព័រ Bangkok Post នាថ្ងៃទី ២១ ខែ មករា នេះ។

យោងតាមទីភ្នាក់ងារអភិវឌ្ឍន៍បច្ចេកវិទ្យាអវកាស និងព័ត៌មានវិទ្យា (Gistda) បានធ្វើការរាយការណ៍នៅវេលាម៉ោង 7 ព្រឹកថា ពេលនេះ PM2.5 កំពុងតែស្ថិតនៅក្នុងកម្រិតពណ៌ក្រហម (គ្រោះថ្នាក់ដល់សុខភាព) នៅក្នុងខេត្តចំនួន 27 ដែលភាគច្រើននៅកណ្តាលប្រទេសថៃតែម្ដង។ ហើយកម្រិតខ្ពស់បំផុតនៃ PM2.5 ដែលបានកត់ត្រាក្នុងរយៈពេល 24 ម៉ោងមុនគឺមានចំនួន 144.8 មីក្រូក្រាមក្នុងមួយម៉ែត្រគូបនៃខេត្តសាមុតសាខុន នៃភាគខាងលិចទីក្រុងបាងកក បន្ទាប់មកគឺ 125.1µg/m³ ក្នុងទីក្រុងបាងកក។