បាងកក៖ រដ្ឋាភិបាលរបស់ប្រទេសថៃបាននិយាយនៅថ្ងៃពុធទី 29 ខែមករាថា ប្រទេសថៃរំពឹងថាផ្នែកផ្លូវដែកល្បឿន 609 គីឡូម៉ែត្រ (378 ម៉ាយ) របស់ខ្លួនដែលនឹងតភ្ជាប់វាជាមួយប្រទេសចិនឆ្លងកាត់ប្រទេសឡាវ នឹងចាប់ផ្តើមប្រតិបត្តិការនៅឆ្នាំ 2030 ពោលគឺជិតមួយទសវត្សរ៍។ 

អ្នកនាំពាក្យរដ្ឋាភិបាលថៃ លោក Jirayu បាននិយាយថា ជាងមួយភាគបីនៃការសាងសង់ត្រូវបានបញ្ចប់នៅក្នុងផ្នែកដែលតភ្ជាប់ ពីទីក្រុងបាងកកទៅកាន់ទីក្រុងនគររាជសីមា ដែលមានចំងាយប្រហែល 220 គីឡូម៉ែត្រ ហើយខ្សែទាំងមូលទៅកាន់ Nong Khai នៅព្រំដែនឡាវនឹងរួចរាល់នៅឆ្នាំ 2030 ។ 

គួរបញ្ជាក់ថា ខ្សែរថភ្លើងដែលមានតម្លៃ 6 ពាន់លានដុល្លារ និងប្រវែង 1000 គីឡូម៉ែត្រពីរដ្ឋធានីវៀងចន្ទន៍ប្រទេសឡាវ ទៅកាន់ទីក្រុងគុនមីងភាគនិរតីនៃប្រទេសចិនបានចាប់ផ្តើមដំណើរការតាំងពីនៅឆ្នាំ 2021 ដែលមានក្រុមហ៊ុនបណ្តាក់ទុន 70% ជាកម្មសិទ្ធិរបស់ទីក្រុងប៉េកាំង។ 

ហើយខ្សែរថភ្លើងនោះនឹងតភ្ជាប់ជាមួយនឹងខេត្ត Nong Khai របស់ប្រទេសថៃតាមរយៈទីក្រុងវៀងចន្ទន៍ដែលមានចម្ងាយប្រហែល ២៥ គីឡូម៉ែត្រ។

លោក Jirayu បាននិយាយថា "នេះគឺជាឱកាសសម្រាប់ប្រទេសថៃក្នុងការតភ្ជាប់ទៅនឹងសេដ្ឋកិច្ចពិភពលោក" ដោយបន្ថែមថាវានឹងនាំប្រទេសថៃឱ្យកាន់តែខិតជិតទៅនឹងគោលដៅរបស់ខ្លួនក្នុងការក្លាយជាមជ្ឈមណ្ឌលដឹកជញ្ជូន។ 

ហើយការប្រកាសនេះធ្វើឡើងមួយឆ្នាំបន្ទាប់ពីប្រទេសចិន បានជំរុញឱ្យប្រទេសថៃមានការរីកចម្រើនលឿនជាងមុនលើផ្លូវដែក។

ទាក់ទងជាមួយនឹងការពិភាក្សាលើផ្លូវដែកនេះ បានចាប់ផ្តើមជិតពីរទសវត្សរ៍មុនឯណោះ ហើយប្រទេសថៃ និងចិនបានចុះហត្ថលេខាលើកិច្ចព្រមព្រៀងលើការសាងសង់របស់ខ្លួនក្នុងឆ្នាំ 2017 ជាមួយនឹងផែនការចាប់ផ្តើមប្រតិបត្តិការនៅឆ្នាំ 2021។ 

ប៉ុន្តែការសាងសង់បានជួបការពន្យារពេលដោយសារការខ្វែងគំនិតគ្នាលើការផ្តល់ហិរញ្ញប្បទាន និងការរចនា ក៏ដូចជាការរំខានពីជំងឺរាតត្បាត COVID-19 ផងដែរ។

ផែនការនេះគឺជាផ្នែកមួយនៃគំនិតផ្តួចផ្តើមពាណិជ្ជកម្មខ្សែក្រវ៉ាត់ និងផ្លូវប្រកបដោយមហិច្ឆិតារបស់ប្រធានាធិបតីចិន Xi Jinping ដែលរួមមានផែនការសម្រាប់ផ្លូវចំនួនបីដែលមានប្រភពចេញពីទីក្រុងគុនមីង ដែលឆ្លងកាត់ប្រទេសមីយ៉ាន់ម៉ា ថៃ និងវៀតណាម៕