តាមសេចក្តីរាយការណ៍ រដ្ឋបាល Trump មានបំណងបញ្ចូលគ្នានូវទីភ្នាក់ងារជំនួយក្រៅប្រទេសដ៏សំខាន់របស់រដ្ឋាភិបាលសហរដ្ឋអាមេរិកជាមួយនឹងក្រសួងរដ្ឋ ខណៈដែលកម្មករត្រូវបានស្នើសុំ ឱ្យស្នាក់នៅក្រៅទីស្នាក់ការកណ្តាលរបស់ទីក្រុងវ៉ាស៊ីនតោនកាលពីថ្ងៃ ចន្ទ ទី ០៣ ខែ កុម្ភៈ ម្សិលមិញនេះ។

រដ្ឋលេខាធិការ Marco Rubio បានប្រាប់អ្នកសារព័ត៌មានថា ឥឡូវនេះគាត់គឺជាប្រធានស្តីទីនៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) ដែលជាទីភ្នាក់ងារដែលចែកចាយជំនួយរាប់ពាន់លានដុល្លារជុំវិញពិភពលោក។

ជុំវិញនៃបញ្ហាដែលកើតមានខាងលើនេះ បានធ្វើឲ្យលោកប្រធានាធិបតី ដូណាល់ ត្រាំ ជាមួយនឹងទីប្រឹក្សាកំពូលរបស់លោកគឺ មហាសេដ្ឋី Elon Musk បានរិះគន់យ៉ាងខ្លាំងចំពោះទីភ្នាក់ងារនេះ។ 

ក្នុងនោះផងដែរ សមាជិកសភាប្រជាធិបតេយ្យក៏បានហៅទង្វើនេះថា "ខុសច្បាប់ និងមិនមានរដ្ឋធម្មនុញ្ញ" ដែលនឹងធ្វើឱ្យប៉ះពាល់ដល់ប្រជាជនក្រីក្រនៅបរទេស ប៉ះពាល់ដល់សន្តិសុខជាតិ និងកាត់បន្ថយឥទ្ធិពលរបស់សហរដ្ឋអាមេរិកនៅលើឆាកពិភពលោកផងដែរ។

គួរឲ្យដឹងថា USAID ត្រូវបានបង្កើតឡើងក្នុងឆ្នាំ 1961 ដោយប្រធានាធិបតី John F Kennedy និងមានបុគ្គលិកប្រហែល 10,000 នាក់ និងថវិកាជិត 40 ពាន់លានដុល្លារ ក្នុងចំណោមចំនួនសរុប 68 ពាន់លានដុល្លារ នៅក្នុងការចំណាយជំនួយបរទេសរបស់រដ្ឋាភិបាលសហរដ្ឋអាមេរិក។

ហើយ USAID ក៏បានធ្វើការចែកចាយជំនួយរាប់ពាន់លានដល់អង្គការមិនមែនរដ្ឋាភិបាល ក្រុមជំនួយ និងអង្គការមិនរកប្រាក់ចំណេញជុំវិញពិភពលោកផងដែរ។

គួរបញ្ជាក់ថា កាលពីម្សិលមិញនេះ ពោលគឺនៅថ្ងៃទី ០៣ ខែ កុម្ភៈ  លោក Musk ដែលជាប្រធានទីភ្នាក់ងារកាត់បន្ថយចំណាយក្រៅផ្លូវការថា រដ្ឋបាលគ្រោងនឹងបិទ USAID។

ហើយនៅខាងក្រៅការិយាល័យរបស់ USAID សមាជិកសភាគណបក្សប្រជាធិបតេយ្យបាននិយាយថា ទង្វើនេះគឺផ្ទុយនឹងច្បាប់ ហើយថាការបិទទីភ្នាក់ងារនេះនឹងធ្វើឱ្យប៉ះពាល់ដល់សន្តិសុខជាតិទៀតផង។