(ម៉ូស្គូ)៖ ប្រភពពីរបស់រុស្ស៊ីបានឱ្យដឹងថា អារ៉ាប៊ីសាអូឌីតនិងអេមីរ៉ាតអារ៉ាប់រួម (UAE) កំពុងត្រូវបានគេពិចារណាថា ជាទីតាំងដែលអាចធ្វើទៅរួចសម្រាប់កិច្ចប្រជុំកំពូលរវាងប្រធានាធិបតីអាមេរិកលោក ដូណាល់ ត្រាំ និងប្រធានាធិបតីរុស្ស៊ីលោក វ្ល៉ាឌីមៀ ពូទីន។ 

នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃទី៤ ខែកុម្ភៈ ឆ្នាំ២០២៥ ។

លោក ត្រាំ ធ្លាប់បានបញ្ជាក់ពីឆន្ទៈក្នុងការជួបជាមួយលោក ពូទីន ដើម្បីពិភាក្សាពីការបញ្ចប់សង្រ្គាមនៅអ៊ុយក្រែន ខណៈលោក ពូទីន ក៏បានបង្ហាញពីការត្រៀមខ្លួនក្នុងការជួប ពិភាក្សានេះផងដែរ។

មន្ត្រីរុស្ស៊ីបានបដិសេធនូវការទាក់ទង ដោយផ្ទាល់ជាមួយសហរដ្ឋអាមេរិកជុំវិញការរៀបចំ កិច្ចប្រជុំនេះ។ 

ទោះយ៉ាងណាប្រភពបានបញ្ជាក់ថា មន្ត្រីជាន់ខ្ពស់រុស្ស៊ីបានធ្វើទស្សនកិច្ច នៅអារ៉ាប៊ីសាអូឌីត និង UAE ក្នុងរយៈពេលប៉ុន្មានសប្តាហ៍ចុងក្រោយនេះ។

ប្រភពមួយទៀតបានលើកឡើងពីការប្រឆាំងផ្ទៃក្នុងខ្លះនៅក្នុងប្រទេសរុស្ស៊ី ចំពោះជម្រើសទីតាំងទាំងនេះ ដោយសារតែទំនាក់ទំនងជិតស្និទ្ធ ផ្នែកយោធានិងសន្តិសុខរវាងប្រទេសទាំងពីរជាមួយសហរដ្ឋអាមេរិក។ 

ទោះជាយ៉ាងណាទាំងលោក ត្រាំ និងលោក ពូទីន មានទំនាក់ទំនងល្អជាមួយមេដឹកនាំនៃប្រទេសទាំងពីរ។ 

រាជទាយាទអារ៉ាប៊ីសាអូឌីត Mohammed bin Salman គឺជាប្រមុខរដ្ឋាភិបាលបរទេសដំបូងគេដែលប្រធានាធិបតី ត្រាំ បានទូរសព្ទទៅក្រោយចូលកាន់តំណែង។ 

ចំណែកលោកពូទីន បានថ្លែងអំណរគុណដល់រាជទាយាទអង្គនេះ សម្រាប់ជំនួយក្នុងការរៀបចំការផ្លាស់ប្តូរអ្នកទោសអាមេរិក-រុស្ស៊ីដ៏ធំបំផុតចាប់តាំងពីសង្គ្រាមត្រជាក់មក ៕