យោងតាមទីភ្នាក់ងារ USAID បាននិយាយថា បុគ្គលិករាប់ពាន់នាក់នៅទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) នឹងត្រូវបានដាក់ឱ្យឈប់សម្រាកពីយប់ថ្ងៃសុក្រស្អែកនេះហើយ។ ហើយបុគ្គលិកទាំងអស់នឹងត្រូវបានជូនដំណឹងនៅរសៀលថ្ងៃ ព្រហស្បតិ៍ នេះ។

រដ្ឋបាល Trump បាននិយាយថា USAID កំពុងខ្ជះខ្ជាយលុយ ហើយត្រូវការតម្រឹមតាមអាទិភាពគោលនយោបាយរបស់ប្រធានាធិបតី។ បុគ្គលិកទីភ្នាក់ងារ ដែលគាំទ្រដោយសមាជិកសភាប្រជាធិបតេយ្យ បានតវ៉ាជុំវិញការកាត់បន្ថយនេះ ដោយនិយាយថា ពួកគេនឹងធ្វើឱ្យជីវិតមនុស្សស្ថិតក្នុងគ្រោះថ្នាក់ និងរារាំងសន្តិសុខជាតិទៀតផង។

សូមជម្រាបថា ចំពោះការសម្រេចចិត្តរបស់ប្រធានាធិបតី Donald Trump ក្នុងការបង្កកជំនួយបរទេសបានធ្វើឱ្យប្រព័ន្ធជំនួយសកល មានផលប៉ះពាល់រួចទៅហើយនៅក្នុងប្រទេសជាច្រើន។ ដោយសារតែទីភ្នាក់ងារនេះផ្តល់ជំនួយមនុស្សធម៌ទៅដល់ប្រទេសជាង 100 ប្រទេសឯណោះ ដែលមានបុគ្គលិកចំនួន 10,000 នាក់នៅទូទាំងពិភពលោក។ ហើយពីរភាគបីនៃបុគ្គលិកទាំងនោះគឺធ្វើការនៅបរទេស។

បើយោងតាមតួលេខផ្លូវការបានបង្ហាញថា ទីភ្នាក់ងារជំនួយអាមេរិក USAID បានបង្កើតឡើងក្នុងឆ្នាំ 1961 មានថវិកាប្រហែល 40 ពាន់លានដុល្លារក្នុងមួយឆ្នាំ ដែលស្មើនឹងប្រហែល 0.6% នៃការចំណាយរបស់សហព័ន្ធ។

បើក្រឡេកទៅតាមអារម្មណ៍ក្នុងសេចក្តីថ្លែងការណ៍នៅលើគេហទំព័ររបស់ USAID កាលពីថ្ងៃអង្គារ ទី០៤ ខែ កុម្ភៈ ទីភ្នាក់ងារ USAID បាននិយាយថា ខ្លួននឹងធ្វើការជាមួយក្រសួងការបរទេសសហរដ្ឋអាមេរិកដើម្បីរៀបចំ និងបង់ប្រាក់សម្រាប់ការធ្វើដំណើរត្រឡប់មកវិញសម្រាប់បុគ្គលិកដែលត្រូវបាន ដាក់ឲ្យនៅខាងក្រៅសហរដ្ឋអាមេរិកក្នុងរយៈពេល 30 ថ្ងៃប៉ុណ្ណោះ។

ចំណែកឯ Elon Musk ដែលជានាយកប្រតិបត្តិរបស់ក្រុមហ៊ុន Tesla និង Space X ក៏បានស្នើឲ្យ USAID គួរតែត្រូវបានបិទទាំងស្រុង។ ឯមនុស្សជាច្រើនបានព្រមានថាការបិទទ្វាររបស់ទីភ្នាក់ងារនេះ នឹងមានផលប៉ះពាល់យ៉ាងធ្ងន់ធ្ងរដល់ប្រជាជនដែលងាយរងគ្រោះនៅទូទាំងពិភពលោក។ 

គួរបញ្ជាក់ថា សកម្មភាពរបស់ទីភ្នាក់ងារ USAID មានចាប់ពីការផ្តល់អវយវៈសិប្បនិម្មិតដល់ទាហានដែលរងរបួសក្នុងប្រទេសអ៊ុយក្រែន រហូតដល់ការបោសសម្អាតមីន និងការទប់ស្កាត់ការរីករាលដាលនៃមេរោគ Ebola នៅអាហ្វ្រិក។ ហើយប្រសិនជា ទីភ្នាក់ងារនេះត្រូវបានបិទពិតមែននោះ ប្រជាជនដែលងាយរងគ្រោះជាច្រើននៅទូទាំងពិភពលោកនឹងលែងមានអ្នកជួយឧបត្ថម្ភ ឬផ្ដល់សេវាដោយឥតគិតថ្លៃក្នុងការព្យាបាលជំងឺ ឬការបោសសម្អាតមីនទៀតហើយ។