ប្រធានាធិបតី ដូណាល់ ត្រាំ បានចុះហត្ថលេខាលើដីកាប្រតិបត្តិមួយ ដោយដាក់ទណ្ឌកម្មដល់តុលាការឧក្រិដ្ឋកម្មអន្តរជាតិដោយចោទប្រកាន់ពីបទ "សកម្មភាពខុសច្បាប់ និងគ្មានមូលដ្ឋាន ដែលផ្តោតលើអាមេរិក និងសម្ព័ន្ធមិត្តជិតស្និទ្ធរបស់លោកគឺអ៊ីស្រាអែល" ។
វិធានការនេះបានដាក់កម្រិតហិរញ្ញវត្ថុ ទិដ្ឋាការលើបុគ្គលនិងក្រុមគ្រួសាររបស់ពួកគេ ដែលជួយក្នុងការស៊ើបអង្កេតរបស់ ICC លើពលរដ្ឋអាមេរិក ឬសម្ព័ន្ធមិត្ត។

កាលពីខែវិច្ឆិកាកន្លងទៅ តុលាការ ICC បានចេញដីកាចាប់ខ្លួនលោក Netanyahu ជុំវិញបទឧក្រិដ្ឋកម្មសង្គ្រាមនៅតំបន់ហ្គាហ្សា ដែលអ៊ីស្រាអែលបានបដិសេធ។ ICC ក៏បានចេញដីកាមួយសម្រាប់មេបញ្ជាការក្រុមហាម៉ាស់ផងដែរ។

គួរបញ្ជាក់ថា នៅក្នុងអាណត្តិដំបូងរបស់លោក ត្រាំ ក្នុងតំណែងជាប្រធានាធិបតី លោកបានដាក់ទណ្ឌកម្មលើមន្ត្រី ICC ដែលកំពុងស៊ើបអង្កេតថា តើកងកម្លាំងអាមេរិកបានប្រព្រឹត្តឧក្រិដ្ឋកម្មសង្រ្គាមនៅក្នុងប្រទេសអាហ្វហ្គានីស្ថានដែរឬទេ។ ហើយទណ្ឌកម្មទាំងនោះត្រូវបានដកចេញដោយរដ្ឋបាលរបស់ប្រធានាធិបតី Joe Biden ។ ចំពោះក្នុងអំឡុងពេលប៉ុន្មានសប្តាហ៍ចុងក្រោយរបស់គាត់នៅក្នុងតំណែងនេះ លោកប្រធានាធិបតី Biden ក៏បានរិះគន់ដីការបស់ ICC សម្រាប់លោក Netanyahu ដោយបានហៅទង្វើនេះថា "គួរឱ្យស្អប់ខ្ពើម" ហើយនិយាយថាមិនមានភាពស្មើគ្នារវាងអ៊ីស្រាអែល និងក្រុមហាម៉ាសទេ។ការចុះហត្ថលេខាលើបទបញ្ជាប្រតិបត្តិចុងក្រោយបំផុតរបស់លោក Trump ធ្វើឡើងបន្ទាប់ពីការប្រកាសរបស់លោក ក្នុងអំឡុងសន្និសីទសារព័ត៌មានរួមគ្នាជាមួយនាយករដ្ឋមន្ត្រីអ៊ីស្រាអែលកាលពីថ្ងៃអង្គារអំពីផែនការសម្រាប់សហរដ្ឋអាមេរិកដើម្បី កាន់កាប់តំបន់ហ្គាហ្សា តាំងទីលំនៅថ្មីរបស់ប្រជាជនប៉ាឡេស្ទីន និងបង្វែរទឹកដីទៅជា "Riviera of the Middle East" ។

លោក Trump បានសរសេរដោយសំដៅទៅលើសង្រ្គាមរវាងអ៊ីស្រាអែល និងក្រុមហាម៉ាស់ ដែលបច្ចុប្បន្នកំពុងស្ថិតក្រោមបទឈប់បាញ់គ្នាថា "តំបន់ហ្គាហ្សាស្ទ្រីបនឹងត្រូវប្រគល់ឱ្យសហរដ្ឋអាមេរិកដោយអ៊ីស្រាអែល នៅពេលបញ្ចប់ការប្រយុទ្ធគ្នា" ។
 
លោកបានបន្តថា ផែនការនេះនឹងពាក់ព័ន្ធទៅនឹងការតាំងទីលំនៅថ្មីរបស់ប៉ាឡេស្ទីន ហើយថាគ្មានទាហានអាមេរិកណាម្នាក់ត្រូវបានដាក់ពង្រាយឡើយ។