ប្រធានាធិបតីប៉ាណាម៉ាលោក José Raúl Mulino បានចោទប្រកាន់សហរដ្ឋអាមេរិកថាបានផ្សព្វផ្សាយ "ការភូតកុហក" បន្ទាប់ពីក្រសួងការបរទេសសហរដ្ឋអាមេរិកបានអះអាងថា នាវារដ្ឋាភិបាលអាមេរិកលែងត្រូវបង់ថ្លៃ ដឹកជញ្ជូនឆ្លងកាត់ព្រែកជីកប៉ាណាម៉ាទៀតហើយ។

ប្រធានាធិបតីអាមេរិក លោក ដូណាល់ ត្រាំ បានបង្ហាញពីគោលបំណងរបស់លោកម្ដងហើយម្ដងទៀតក្នុងការចង់គ្រប់គ្រងផ្លូវទឹកឡើងវិញ ចាប់តាំងពីលោកចូលកាន់តំណែងមកម្ល៉េះ។ 

ប្រឡាយប៉ាណាម៉ាគឺជាផ្លូវឆ្លងកាត់ដែលមានប្រវែង 82 គីឡូម៉ែត្រ ដែលតភ្ជាប់មហាសមុទ្រអាត្លង់ទិក និងប៉ាស៊ីហ្វិកឆ្លងកាត់ប្រទេសអាមេរិកកណ្តាល។ ដោយក្នុងនោះនាវាទាំងអស់ត្រូវបានតម្រូវឱ្យបង់ថ្លៃដោយផ្អែកលើទំហំ និងប្រភេទសម្រាប់ការឆ្លងកាត់ផ្លូវទឹក ប៉ុន្តែកប៉ាល់របស់អាមេរិកមានអាទិភាពក្នុងការឆ្លងកាត់ជាង។

ហើយកាលពីប៉ុន្មានថ្ងៃមុន នៅក្នុងការបង្ហោះនៅលើ X កាលពីថ្ងៃពុធ ក្រសួងការបរទេសបានសរសេរថា "ឥឡូវនេះ នាវារបស់រដ្ឋាភិបាលសហរដ្ឋអាមេរិកអាចឆ្លងកាត់ព្រែកជីក Panama ដោយមិនគិតថ្លៃ ដោយសន្សំប្រាក់របស់រដ្ឋាភិបាលសហរដ្ឋអាមេរិករាប់លានដុល្លារក្នុងមួយឆ្នាំ" ។ ប៉ុន្តែភ្លាមៗ លោក Mulino បានប្រតិកម្មទៅនឹងសេចក្តីថ្លែងការណ៍នេះតែម្ដង ដោយនិយាយថាគាត់បដិសេធទៅនឹង "វិធីសាស្រ្តនៃការគ្រប់គ្រងទំនាក់ទំនងទ្វេភាគីនេះដោយផ្អែកលើមូលដ្ឋាននៃការកុហកនិងភាពមិនពិត" ។ លោក Mulino បានបន្ថែមថា នាវារដ្ឋាភិបាលសហរដ្ឋអាមេរិក រួមទាំងនាវាកងទ័ពជើងទឹកបានបង់ប្រាក់ពី 6-7 លានដុល្លារ ក្នុងមួយឆ្នាំសម្រាប់សិទ្ធិឆ្លងកាត់ព្រែកជីកប៉ាណាម៉ា។ ហើយអាជ្ញាធរព្រែកជីកប៉ាណាម៉ា (ACP) ក៏បានធ្វើសេចក្តីថ្លែងការណ៍មួយដោយនិយាយថា ខ្លួនមិនបានធ្វើការកែតម្រូវណាមួយចំពោះថ្លៃសេវាឡើយ ដោយបន្ថែមថាវាបើកចំហរដើម្បីបង្កើតការសន្ទនា។