ក្រុម Hamas គ្រោងនឹងដោះលែង បុរសជនជាតិអ៊ីស្រាអែលចំនួនបីនាក់ ពីតំបន់ហ្គាហ្សានៅថ្ងៃសៅរ៍ក្រោយ វាក្លាយជាការផ្លាស់ប្តូរជុំទីប្រាំហើយ ក្រោមបទឈប់បាញ់ដែលកំពុងបន្តអនុវត្តន៍។

ការិយាល័យនាយករដ្ឋមន្ត្រីអ៊ីស្រាអែលបានបញ្ជាក់ថា លោក Ohad Ben Ami, Eli Sharabi និង Or Levy ត្រូវបានគេរំពឹងថានឹងត្រូវបានដោះលែង ក្រោយពួកគេជាប់ឃុំអស់រយៈពេល491ថ្ងៃ ។  ហើយចំនួនអ្នកទោសប៉ាឡេស្ទីន នឹងត្រូវដោះលែងជាថ្នូរនឹងគ្នា។ ក្រុមយុទ្ធជនហាម៉ាស់ បាននឹងកំពុងប្រមូលផ្តុំគ្នានៅ ឌៀល អាល បាឡា ( Deir al-Balah ) កណ្តាលហ្គាហ្សា សម្រាប់ការផ្ទេរនេះ ខណៈដែលហ្វូងមនុស្សជាច្រើន ក៏កំពុងកកកុញនៅទីលានចំណាប់ខ្មាំងដែលកំពុងរង់ចាំការដោះលែងក្នុងទីក្រុង តែល អាវីស ( Tel Aviv )  របស់អ៊ីស្រាអែល ។

លោក Ben Ami អាយុ 56 ឆ្នាំ ត្រូវបានចាប់ខ្លួន នៅថ្ងៃទី7 ខែតុលា ឆ្នាំ 2023 ពីផ្ទះរបស់គាត់នៅ Kibbutz Be'eri ហើយប្រពន្ធរបស់គាត់ គឺលោកស្រី​ Raz Ben Ami ក៏ត្រូវបានចាប់ជាឈ្លើយសឹក និងត្រូវបានដោះលែងក្នុងអំឡុងពេលបទឈប់បាញ់កាលពីខែវិច្ឆិកា ឆ្នាំ 2023 កន្លងទៅ ។

លោក Sharabi  មានអាយុ 52 ឆ្នាំ ក៏ត្រូវបានចាប់ខ្លួន ចំណែក ប្រពន្ធ និង​កូន​ស្រី​របស់​គាត់​ត្រូវ​បាន​គេ​ធ្វើ​ឃាត ​កាល​ពី​ថ្ងៃ​ទី​៧ ខែ​តុលា នេះ​បើ​តាម​គេហទំព័រ kibbutz។ បងប្រុសរបស់គាត់ លោក Yossi Sharabi ដែលត្រូវបានចាប់ជាឈ្លើយសឹងនោះ បានស្លាប់នៅក្នុង Gaza ហើយសាកសពរបស់គាត់ក៏នៅទីនោះដែរ  នេះបើយោងតាមយោធាអ៊ីស្រាអែលបានបញ្ចាក់ប្រាប់ ។

ដោយឡែកលោក Or Levy មានអាយុ34ឆ្នាំ លោកត្រូវបានគេចាប់ខ្លួន ខណៈលោកកំពុងចូលរួមក្នុងពិធីបុណ្យតន្ត្រី Nova កាលពីថ្ងៃទី7 ខែតុលា  តែប្រពន្ធរបស់គាត់លោក  Eynav ត្រូវបានសម្លាប់នៅក្នុងការវាយប្រហារនេះ ។ 

នៅក្នុងសេចក្តីថ្លែងការណ៍មួយ របស់អ្នកនាំពាក្យលោក Michal Peikin បានអបអរសាទរការដោះលែងអ្នកស្រុក Kibbutz Be'eri ចំនួនពីរនាក់ ដូចអ្វីដែលបានគ្រោងទុក។

លោកបន្តថា " ជាមួយនឹងការត្រឡប់មកវិញរបស់ Eli និង Ohad យើងអាចបានធូរស្រាល ប៉ុន្តែវានឹងមិនត្រលប់មកធម្មតាវិញទេ រហូតទាល់តែចំណាប់ខ្មាំងទាំងអស់ត្រឡប់មកជួបជុំគ្រួសាររបស់ពួកគេវិញដោយសុវត្ថិភាព ហើយអ្នកដែលត្រូវគេសម្លាប់ទាំងអស់ ត្រូវបានយកសពត្រលប់វិញមកបញ្ចុះ "។