ប្រធានាធិបតីអាមេរិកលោក Donald Trump បានប្រកាសកិច្ចព្រមព្រៀងជាមួយនាយករដ្ឋមន្ត្រីឥណ្ឌាគឺលោក Narendra Modi សម្រាប់ទីក្រុង Delhi ក្នុងការនាំចូលប្រេងនិងឧស្ម័នពីសហរដ្ឋអាមេរិកបន្ថែមទៀត ដើម្បីកាត់បន្ថយឱនភាពពាណិជ្ជកម្មរវាងប្រទេសទាំងពីរ។

លោក Trump បាននិយាយនៅក្នុងសន្និសីទសារព័ត៌មានរួមគ្នាមួយនៅទីក្រុងវ៉ាស៊ីនតោនថា "ពួកគេនឹងទិញប្រេង និងឧស្ម័នជាច្រើនរបស់យើង។ 

ពួកគេត្រូវការវា ហើយយើងមានវា" ។

ឯលោក Modi ក៏បាននិយាយដែរថា “ដើម្បីធានាសន្តិសុខថាមពលរបស់ឥណ្ឌា យើងនឹងផ្តោតលើពាណិជ្ជកម្មប្រេង និងឧស្ម័ន” ហើយលោកថែមទាំងសន្យាថានឹងវិនិយោគបន្ថែមទៀតទៅលើថាមពលនុយក្លេអ៊ែរ។

ដំណើរទស្សនកិច្ចរយៈពេលពីរថ្ងៃរបស់លោក ម៉ូឌី ធ្វើឡើងនៅពេលដែលលោក Trump បានបញ្ជាថាដៃគូពាណិជ្ជកម្មរបស់សហរដ្ឋអាមេរិក គួរតែប្រឈមមុខនឹងពន្ធនាំចូលទៅវិញទៅមក ។

បន្ទាប់ពីមានទំនាក់ទំនងទ្វេភាគីជាមួយឥណ្ឌា លោក Trump បានបញ្ជាឱ្យទីប្រឹក្សារបស់គាត់គណនាពន្ធថ្មីយ៉ាងទូលំទូលាយលើដៃគូពាណិជ្ជកម្មអាមេរិក ជុំវិញពិភពលោកដោយព្រមានថាពន្ធថ្មីនេះអាចចាប់ផ្តើមចូលជាធរមាននៅថ្ងៃទី ០១ ខែ មេសា ឆ្នាំ ២០២៥ ខាងមុខនេះ។ បើតាមឯកសារនេះបានកត់សម្គាល់ថាពន្ធគយជាមធ្យមរបស់សហរដ្ឋអាមេរិកលើទំនិញកសិកម្មគឺ ៥% សម្រាប់ប្រទេសដែលទីក្រុងវ៉ាស៊ីនតោនបានផ្តល់ឋានៈជាប្រទេសដែលពេញចិត្តបំផុត (MFN) ។ 

ហើយចំពោះពន្ធគយ MFN ជាមធ្យមរបស់ឥណ្ឌាដែលអាមេរិកបានអនុវត្តគឺ ៣៩% ។ ចំណែកឥណ្ឌាក៏គិតពន្ធ 100% លើម៉ូតូរបស់អាមេរិកផងដែរ។
 
សូមជម្រាបថា កាលពីថ្ងៃព្រហស្បតិ៍ លោក Trump បានទទួលស្គាល់ហានិភ័យនៃគោលនយោបាយពន្ធរបស់លោក ខណៈដែលអ្នកសេដ្ឋកិច្ចបានព្រមានថា ពន្ធនាំចូលអាចជំរុញឲ្យតម្លៃទំនិញប្រើប្រាស់ឡើងថ្លៃ។ 

ដោយលោក Trump បានដាក់ពន្ធបន្ថែម 10% លើការនាំចូលពីប្រទេសចិនរួចហើយ ដែលលើកឡើងពីការផលិតថ្នាំ fentanyl ដែលជាថ្នាំអាភៀនដ៏សាហាវ និងបានបង្កឱ្យមានការរីករាលដាលនៃការប្រើជ្រុលរបស់សហរដ្ឋអាមេរិក។ 

ក្នុងនោះលោកក៏បានត្រៀមពន្ធលើប្រទេសកាណាដា និងម៉ិកស៊ិក ដែលជាដៃគូពាណិជ្ជកម្មដ៏ធំបំផុតពីររបស់អាមេរិក ដែលអាចចូលជាធរមានក្នុងខែមីនា បន្ទាប់ពីត្រូវបានផ្អាកអស់រយៈពេល ៣០ ថ្ងៃ។