សេអ៊ូល៖ តុលាការធម្មនុញ្ញរបស់កូរ៉េខាងត្បូងនៅថ្ងៃសុក្រនេះ បានដកលោក Yoon Suk Yeol ចេញពីតំណែងប្រធានាធិបតីហើយ ជុំវិញការប្រកាសច្បាប់អាជ្ញាសឹករបស់លោក ដែលជាហេតុនាំឲ្យមានការបញ្ឆេះនូវវិបត្តិនយោបាយដ៏អាក្រក់បំផុត ក្នុងរយៈពេលជាច្រើនទសវត្សរ៍។ 

បន្ទាប់ពីការដកតណែងលោក យ៉ូន ប្រទេសកូរ៉េខាងត្បូងនឹងត្រូវរៀបចំការបោះឆ្នោតប្រធានាធិបតីថ្មីក្នុងរយៈពេល 60 ថ្ងៃខាងមុខ។ 

ហើយរហូតមកដល់ពេលនេះ នាយករដ្ឋមន្ត្រី Han Duck-soo នឹងនៅតែជាប្រធានាធិបតីស្តីទីដដែល។ 

រីឯប្រធានាធិបតីថ្មីនឹងចូលកាន់តំណែងភ្លាមៗ នៅពេលដែលគណៈកម្មាធិការជាតិរៀបចំការបោះឆ្នោតបានប្រកាសលទ្ធផល។

ហើយចំពោះអ្នកដែលឈ្នះការបោះឆ្នោត អាទិភាពនឹងនាំមកនូវស្ថិរភាពនយោបាយក្នុងស្រុក រួមទាំងនឹងទទួលយកភារកិច្ចជាច្រើនក្នុងការដោះស្រាយជាមួយប្រធានាធិបតីអាមេរិកលោក Donald Trump ។ 

ព្រោះថាពេលនេះលោក Trump កំពុងតែដាក់សម្ពាធយ៉ាងខ្លាំងទៅលើប្រទេសដែលជាសម្ព័ន្ធមិត្តរបស់អាមេរិកជាមួយនឹងពន្ធគយ ក៏ដូចជាការទាមទារឱ្យកូរ៉េខាងត្បូងបង់ប្រាក់បន្ថែមទៀត សម្រាប់កងទ័ពអាមេរិកដែលឈរជើងនៅទីនោះ។ ចំពោះភាពតានតឹងនៅលើឧបទ្វីបកូរ៉េក៏កំពុងកើនឡើងខ្ពស់ផងដែរ។ 

ម្យ៉ាងវិញទៀត កូរ៉េខាងត្បូងក៏បានផ្អាកកិច្ចសន្យាយោធាជាមួយកូរ៉េខាងជើងក្នុងគោលបំណងកាត់បន្ថយភាពតានតឹងផ្នែកយោធា ដោយទប់ស្កាត់សមយុទ្ធបាញ់គ្រាប់ពិតនៅតាមព្រំដែនផងដែរ។ 

ហើយដោយសារតែមូលហេតុនេះហើយ ទើបបានជារដ្ឋធម្មនុញ្ញរបស់កូរ៉េខាងជើងបានកំណត់ប្រទេសកូរ៉េខាងត្បូងជាសត្រូវដ៏សំខាន់របស់ខ្លួន។