ប្រជាជនហុងកុងមួយចំនួន បានលុបចោលការធ្វើដំណើររបស់ពួកគេទៅកាន់ប្រទេសជប៉ុនភ្លាមៗ បន្ទាប់ពីមានការព្រមានអំពីគ្រោះរញ្ជួយដីថ្មី ដែលទើបនឹងចេញដោយអាជ្ញាធររបស់ប្រទេស ខណៈដែលអ្នកផ្សេងទៀតបាននិយាយថាពួកគេនឹងបន្តការប្រុងប្រយ័ត្នបន្ថែមទៀតចំពោះការព្រមាននេះ។ នេះបើយោងតាមការចេញផ្សាយពីគេហទំព័រ Bangkok Post នាថ្ងៃទី ០៤ ខែមេសា ឆ្នាំ២០២៥ នេះ។

ជុំវិញនៃការព្រមានដែលទាក់ទងនឹងគ្រោះរញ្ជួយដីនៅប្រទេសជប៉ុននេះ ត្រូវបានគេធ្វើការប៉ាន់ប្រមាណថា អាចមានកម្រិតពី ៨ រ៉ិចទ័រ ឬខ្ពស់ជាងនេះ។

គួរបញ្ជាក់ថា កាលពីថ្ងៃចន្ទ អាជ្ញាធរជប៉ុនបានចេញផ្សាយការប៉ាន់ប្រមាណថ្មីមួយសម្រាប់ការរញ្ជួយដីដ៏មានសក្តានុពលនៅឆ្នេរសមុទ្រប៉ាស៊ីហ្វិករបស់ប្រទេសនេះ ដោយក្នុងនោះអាជ្ញាធរប្រទេសនេះ បានធ្វើការសន្និដ្ឋានទុកជាមុនថា ក្នុងគ្រោះរញ្ជួយដីនេះ អាចនឹងបណ្តាលឱ្យមនុស្សជិត 300.000 នាក់ស្លាប់ និងមនុស្ស 1.2 លាននាក់ត្រូវជម្លៀសចេញ រួមទាំងការខូចខាតនូវថវិកាចំនួន 270 ពាន់ពាន់លានយ៉េនជប៉ុនថែមទៀតផង ដែលនេះគ្រាន់តែជាការព្យាករណ៍ទុកមុនប៉ុណ្ណោះ។

ពាក់ព័ន្ធនឹងការព្យាករណ៍នេះ នាយកប្រតិបត្តិក្រុមហ៊ុន Qualifirst Insurance Consultants បានជំរុញឱ្យអ្នកធ្វើដំណើរទាំងអស់ដែលបានទៅប្រទេសជប៉ុនគួរតែនាំគ្នាទិញនូវការធានារ៉ាប់រងឱ្យបានឆាប់ ដើម្បីជាការធានានូវសុវត្ថិភាពរបស់ពួកគេ។