លោក Yoon តុលាការរដ្ឋធម្មនុញ្ញនៃប្រទេសកូរ៉េខាងត្បូង បានបោះឆ្នោតជាឯកច្ឆន្ទ នៅថ្ងៃទី០៤ ខែមេសា ដកតំណែងជាប្រធានាធិបតី ក៏កំពុងប្រឈមនឹងការចោទប្រកាន់ផ្លូវព្រហ្មទណ្ឌដាច់ដោយឡែកមួយទៀត ពីបទ៖ «ញុះញង់ឱ្យមានការបះបោរ» ដែលអាចនាំឱ្យគាត់ប្រឈមនឹងការផ្តន្ទាទោសដល់ទណ្ឌកម្មប្រហារជីវិត ឬការជាប់គុកមួយជីវិត ប្រសិនបើត្រូវបានផ្តន្ទាទោស។

នៅថ្ងៃសុក្រ ទី០៤ ខែមេសា ឆ្នាំ២០២៥នេះ តុលាការរដ្ឋធម្មនុញ្ញនៃប្រទេសកូរ៉េខាងត្បូងបានបោះឆ្នោតជាឯកច្ឆន្ទ ដើម្បីគាំទ្រការចោទប្រកាន់លោកប្រធានាធិបតី Yoon Suk Yeol ដែលត្រូវបានផ្អាកពីតំណែងបន្ទាប់ពីការប្រកាសច្បាប់អាជ្ញាសឹករយៈពេលខ្លីរបស់លោកនៅថ្ងៃទី០៣ ខែធ្នូ ឆ្នាំ២០២៤ កន្លងទៅ។ 

ការសម្រេចចិត្តនេះ បានធ្វើឱ្យ លោក Yoon ក្លាយជាប្រធានាធិបតីទីពីរក្នុងប្រវត្តិសាស្ត្រកូរ៉េខាងត្បូងដែលត្រូវបានដកចេញពីតំណែងតាមរយៈការចោទប្រកាន់ បន្ទាប់ពីលោកស្រី Park Geun-hye ក្នុងឆ្នាំ២០១៧។ បន្ទាប់ពីការសម្រេចចិត្តនេះ កូរ៉េខាងត្បូងត្រូវរៀបចំការបោះឆ្នោតប្រធានាធិបតីថ្មីក្នុងរយៈពេល ៦០ ថ្ងៃ ពោលគឺមុនថ្ងៃទី០៣ ខែមិថុនា ឆ្នាំ២០២៥។ លោក Han Duck-soo នាយករដ្ឋមន្ត្រី នឹងបន្តធ្វើជាប្រធានាធិបតីស្តីទីរហូតដល់មានប្រធានាធិបតីថ្មីត្រូវបានជ្រើសរើស។ 

លើសពីនេះ លោក Yoon ក៏កំពុងប្រឈមនឹងការចោទប្រកាន់ផ្លូវព្រហ្មទណ្ឌដាច់ដោយឡែកមួយទៀត ពីបទ៖ «ញុះញង់ឱ្យមានការបះបោរ» ដែលអាចនាំឱ្យគាត់ប្រឈមនឹងការផ្តន្ទាទោសដល់ទណ្ឌកម្មប្រហារជីវិត ឬការជាប់គុកមួយជីវិត ប្រសិនបើត្រូវបានផ្តន្ទាទោស ទោះបីជាកូរ៉េខាងត្បូងមិនបានអនុវត្តការប្រហារជីវិតតាំងពីឆ្នាំ ១៩៩៧ ក៏ដោយ៕