កាលពីថ្ងៃសុក្រ ម្សិលមិញនេះ ប្រទេសចិនបានធ្វើការសងសឹកប្រឆាំងនឹងពន្ធថ្មីរបស់សហរដ្ឋអាមេរិកវិញជាមួយនឹងវិធានការជាបន្តបន្ទាប់ រួមទាំងការយកពន្ធចំនួន 34% លើការនាំចូល និងការត្រួតពិនិត្យរាល់ការនាំចេញរបស់អាមេរិកទាំងអស់នៅលើទឹកដីរបស់ខ្លួន ដែលជាការបង្កើនក្នុងការប្រយុទ្ធពាណិជ្ជកម្ម ដែលកំពុងតែធ្វើឱ្យទីផ្សារពិភពលោកកាន់តែមានភាពច្របូកច្របល់។ 

ហើយចំពោះការអនុវត្តពន្ធទៅលើអមេរិកវិញនេះ នឹងធ្វើឡើងនៅថ្ងៃទី ១០ ខែមេសា ខែមុខនេះហើយ ដោយត្រូវគ្នានឹងអ្វីដែលលោក ត្រាំ បានប្រកាសលើផលិតផលចិន។ នេះបើយោងតាមការចេញផ្សាយពីគេហទំព័រ Bangkok Post នាថ្ងៃទី ០៥ ខែមេសា ឆ្នាំ២០២៥ ។

ជុំវិញវិធានការនៃការដាក់ពន្ធសងសឹករបស់ចិនទៅកាន់អាមេរិកវិញនេះ គឺដោយសារតែពន្ធគយចុងក្រោយបំផុតរបស់សហរដ្ឋអាមេរិក នឹងបង្កើនការយកពន្ធលើផលិតផលចិនស្ទើរតែទាំងអស់រហូតទៅដល់ 54% ឯណោះ ដែលការតំឡើងពន្ធម្ដងហើយម្ដងទៀតរបស់អាមេរិកនេះ អាចប៉ះពាល់ដល់ការនាំចេញរបស់ចិនទៅកាន់សហរដ្ឋអាមេរិកផងដែរ។ 

ភាពតានតឹងរវាងទីក្រុងវ៉ាស៊ីនតោន និងទីក្រុងប៉េកាំងកាន់តែអាក្រក់ឡើងហើយចាប់តាំងពីលោក Trump ត្រឡប់មកសេតវិមានវិញ។ 

ហើយបន្ទាប់ពីការចូលកាន់តំណែងឡើងវិញរបស់លោក ត្រាំ ប្រធានាធិបតីអាមេរិករូបនេះនៅមិនទាន់និយាយជាមួយសមភាគីចិននៅឡើយទេ។

បើយោងតាមការវិភាគសេដ្ឋកិច្ចរបស់ Bloomberg បានឱ្យដឹងថា ពន្ធជាមធ្យមរបស់ចិនលើទំនិញអាមេរិកមានចំនួន 17.8% តិចជាង 32.8% ដែលសហរដ្ឋអាមេរិកគិតថ្លៃលើទំនិញរបស់ចិន។ ហើយកាលពីឆ្នាំមុន ចិនបាននាំចូលទំនិញជិត៦៤ពាន់លានពីអាមេរិក ដែលជាចំនួនទាបបំផុតក្នុងរយៈពេល៤ឆ្នាំ។

ចំណែកឯ ក្រសួងហិរញ្ញវត្ថុបាននិយាយនៅក្នុងសេចក្តីថ្លែងការណ៍មួយដោយប្រកាសពន្ធ 34% ថា "សកម្មភាពរបស់សហរដ្ឋអាមេរិកមិនគោរពតាមច្បាប់ពាណិជ្ជកម្មអន្តរជាតិធ្វើឱ្យខូចយ៉ាងធ្ងន់ធ្ងរដល់សិទ្ធិ និងផលប្រយោជន៍ស្របច្បាប់របស់ប្រទេសចិននិងជាការគំរាមកំហែងឯកតោភាគីធម្មតា" ។