បាងកក៖ ប្រព័ន្ធផ្សព្វផ្សាយរដ្ឋបាននិយាយនាថ្ងៃសៅរ៍នេះថា ចំនួនអ្នកស្លាប់ដោយសារគ្រោះរញ្ជួយដីដ៏ខ្លាំងក្លានៅប្រទេសមីយ៉ាន់ម៉ាបានកើនឡើងដល់ ៣,៣៥៤នាក់ហើយ រួមទាំងអ្នករបួសចំនួន ៤,៨៥០នាក់ និងបាត់ខ្លួនចំនួន ២២០នាក់ ។

រីឯមេដឹកនាំរដ្ឋាភិបាលយោធា លោកឧត្តមសេនីយ៍ Min Aung Hlaing បានត្រលប់មករដ្ឋធានី Naypyitaw វិញហើយ បន្ទាប់ពីបានធ្វើដំណើរទៅក្រៅប្រទេសដើម្បីចូលរួមកិច្ចប្រជុំកំពូលនៅទីក្រុងបាងកកនៃប្រជាជាតិអាស៊ីអាគ្នេយ៍ ដែលលោកក៏បានជួបដាច់ដោយឡែកពីគ្នាជាមួយមេដឹកនាំនៃប្រទេសថៃ នេប៉ាល់ ប៊ូតាន ស្រីលង្កា និងឥណ្ឌាផងដែរ។

ប្រព័ន្ធផ្សព្វផ្សាយរដ្ឋមីយ៉ាន់ម៉ាបាននិយាយថា លោក Min Aung Hlaing បានអះអាងសារជាថ្មីទៅកាន់នាយករដ្ឋមន្ត្រីឥណ្ឌា Narendra Modi អំពីផែនការរបស់របបយោធាក្នុងការរៀបចំការបោះឆ្នោត "ដោយសេរី និងយុត្តិធម៌" នៅខែធ្នូ។ ចំណែកឯអ្នកនាំពាក្យក្រសួងការបរទេសឥណ្ឌាបាននិយាយកាលពីថ្ងៃសុក្រថា លោក Modi បានអំពាវនាវឱ្យមានបទឈប់បាញ់ក្រោយការរញ្ជួយដី នៅក្នុងសង្គ្រាមស៊ីវិលរបស់ប្រទេសមីយ៉ាន់ម៉ា។

គួរបញ្ជាក់ថា ចាប់តាំងពីការផ្តួលរំលំរដ្ឋាភិបាលស៊ីវិលជាប់ឆ្នោតរបស់លោកស្រី អ៊ុងសាន ស៊ូជី ក្នុងឆ្នាំ 2021 មក យោធាបានតស៊ូដើម្បីគ្រប់គ្រងប្រទេសមីយ៉ាន់ម៉ាដោយបានបន្សល់ទុកសេដ្ឋកិច្ចនិងសេវាមូលដ្ឋាន រួមទាំងការថែទាំសុខភាពស្ថិតក្នុងសភាពទ្រុឌទ្រោម ដែលពេលនេះស្ថានការណ៍គឺកាន់តែធ្ងន់ធ្ងរដោយសារតែគ្រោះមហន្តរាយរញ្ជួយដីការកាលពីថ្ងៃទី 28 ខែមីនា កន្លងទៅនេះ។ 

ក្នុងនោះ អង្គការសហប្រជាជាតិបាននិយាយថា សង្គ្រាមស៊ីវិលដែលកើតឡើងក្រោយរដ្ឋប្រហារបានធ្វើឱ្យមនុស្សជាង 3 លាននាក់ផ្លាស់ទីលំនៅ ដោយមានអសន្តិសុខស្បៀងរីករាលដាល ហើយជាងមួយភាគបីនៃប្រជាជនដែលត្រូវការជំនួយមនុស្សធម៌។ 

ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបាននិយាយកាលពីថ្ងៃសុក្រថា របបយោធាកំពុងរឹតបន្តឹងការផ្គត់ផ្គង់ជំនួយដល់តំបន់រងគ្រោះដោយរញ្ជួយដី ដែលសហគមន៍មិនគាំទ្រការគ្រប់គ្រងរបស់ខ្លួន។