កំពង់ស្ពឺ៖ លោកជំទាវ ជា សុផាកន្នី ភរិយា ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងជាប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រសួងបរិស្ថាន នៅថ្ងៃទី២១ ខែកញ្ញា ឆ្នាំ២០២៤ បានដឹកនាំប្រតិភូនារីកម្ពុជាដើម្បីសន្តិភាព និងអភិវឌ្ឍន៍ក្រសួងបរិស្ថាន បានជួបសំណេះសំណាល សួរសុខទុក្ខ និងផ្សព្វផ្សាយស្ដីពីវិធាន ការថែទាំសុខភាព រស់នៅស្អាត គ្មានជំងឺគ្រុនចាញ់ នៅសហគមន៍តំបន់ការពារធម្មជាតិចំបក់ ក្នុងភូមិសាស្រ្ត ឧទ្យានជាតិព្រះសុរាម្រិតកុសុមៈ «គីរីរម្យ» នៅក្នុងឃុំចំបក់ ស្រុកភ្នំស្រួច ខេត្តកំពង់ស្ពឺ។

លោកជំទាវ ជា សុផាកន្នី បានមានប្រសាសន៍ជំរុញភាពស្អាត និងបំផុសការយល់ដឹងជាសាធារណៈឱ្យកាន់តែទូលំទូលាយនៅទូទាំងប្រទេស ជាពិសេសនៅតាមទីជនបទ ដើម្បីផ្លាស់ប្ដូរផ្នត់គំនិត និងទម្លាប់រស់នៅប្រចាំថ្ងៃស្អាត ការពារកុំឱ្យមានការចម្លងជំងឺគ្រុនចាញ់ ដើម្បីអនាគតកម្ពុជាគ្មានជំងឺគ្រុនចាញ់។

នៅក្នុងឱកាសនោះ លោកជំទាវ ជា សុផាកន្នី បានលើកឡើងថា៖ «ការផ្សព្វផ្សាយចំណេះដឹង ស្ដីពី  ការការពារ ទប់ស្កាត់ និងលុបបំបាត់ជំងឺគ្រុនចាញ់ និងគ្រុនឈាមនាពេលនេះពិតជាមានសារៈសំខាន់ណាស់ ចំពោះបងប្អូនប្រជាសហគមន៍ និងមន្រ្តីឧទ្យានរក្ស ដែលបាននឹងកំពុងរស់នៅចុះល្បាត និងបម្រើសេវាកម្មអេកូទេសចរណ៍ នៅតាមតំបន់ការពារធម្មជាតិ»។

លោកជំទាវភរិយារដ្ឋមន្រ្តីក្រសួងបរិស្ថាន បានចែកមុងជ្រលក់ថ្នាំ ព្រមទាំងគ្រឿងឧបភោគបរិភោគ សម្ភារប្រើប្រាស់ជាច្រើន ជូនដល់ប្រជាសហគមន៍ និងមន្រ្តីឧទ្យានុរក្ស ដែលកំពុងឈរជើងនៅក្នុងតំបន់ការពារធម្មជាតិក្នុងភូមិសាស្រ្តខេត្តកំពង់ស្ពឺ៕