ថៃ៖ អាជ្ញាធរថៃនៅទីក្រុង Tak បានបញ្ជាក់ថា តារាសម្តែងចិន Wang Xing ឬហៅកាត់ថា Xingxing បានបាត់ខ្លួនតាំងពីឆ្លងព្រំដែនចូលប្រទេសមីយ៉ាន់ម៉ា ហើយអាជ្ញាធរមីយ៉ាន់ម៉ាកំពុងតែស្វែងរកគាត់ នេះបើយោងតាមការចេញផ្សាយពីគេហទំព័រ  Bangkok post​ នាថ្ងៃ អង្គារ ទី ០៧ ខែ​ មករា នេះ។

ទោះបីជាយ៉ាងណាក៏ដោយ អ្នកនាំពាក្យប៉ូលីសបាននិយាយកាលពីថ្ងៃអង្គារ ខែ មករា នេះថា មិនមានភស្តុតាងណាមួយដែលបង្ហាញថា តារាចិនរូបនេះត្រូវបានគេបង្ខំឱ្យទៅប្រទេសមីយ៉ាន់ម៉ានោះទេ ពោលគឺដំណើររបស់តារារូបនេះហាក់ដូចជាស្ម័គ្រចិត្តទៅខ្លួនឯងច្រើនជាង។ 

បើយោងតាមប្រភពពីសន្តិសុខនៅឯទីក្រុង Tak បាននិយាយកាលពីថ្ងៃអង្គារនេះដែរថា មន្ត្រីថៃបានស្នើសុំអាជ្ញាធរទាំងអស់នៅក្នុងប្រទេសមីយ៉ាន់ម៉ា ឱ្យជួយក្នុងការស្វែងរកតារាសម្តែងចិនរូបនេះ ព្រោះថាបើយោងទៅតាមរូបភាពរបស់ CCTV តារារូបនេះទំនងជាបានឆ្លងកាត់ព្រំដែនពី Ban Mae Kon Ken ក្នុង tambon Mahawan នៃស្រុក Mae Sot ក្នុងទីក្រុង Tak ។

ហេតុការណ៍នេះបានកើតឡើងអំឡុងពេលដែល ស្ថានទូតចិននៅឯទីក្រុងបាងកក ហើយនិងអគ្គកុងស៊ុលចិនប្រចាំខេត្តឈៀងម៉ៃ បានទទួលរបាយការណ៍ពីក្រុមគ្រួសាររបស់តារាសម្តែងរូបនេះអំពីការបាត់ខ្លួនរបស់គាត់ ហើយពួកគេកំពុងតែប្រឹងប្រែងអស់ពីសមត្ថភាពហើយដើម្បីស្វែងរកគាត់។

គួរបញ្ជាក់ថា មុនពេលកើតហេតុ តារាសម្តែងវ័យ ៣១ ឆ្នាំខាងលើ ត្រូវបានគេរាយការណ៍ថាបានចាកចេញពីអាកាសយានដ្ឋាន Shanghai Pudong ហើយបានចុះចតនៅអាកាសយានដ្ឋានសុវណ្ណភូមិនៅខាងក្រៅនៃទីក្រុងបាងកក នៅវេលាម៉ោងប្រហែល ៣ ទៀបភ្លឺ កាលពីថ្ងៃសុក្រសប្តាហ៍មុន បន្ទាប់ពីត្រូវបានអញ្ជើញឱ្យចូលរួមក្នុងការសវនកម្មមួយ។ 

ហើយបន្ទាប់ពីនោះ គាត់ក៏បានធ្វើដំណើរទៅកាន់ស្រុក Mae Sot នៃ Tak តាមរយៈខេត្ត Chai Nat និង Kamphaeng Phet។ 

តារារូបនេះត្រូវបានគេប្រទះឃើញចុងក្រោយនៅជិតព្រំដែនក្នុង Mae Sot ប្រហែលម៉ោង ១០ : ១០ នាទី កាលពីព្រឹកថ្ងៃសុក្រ។ 
 
យ៉ាងណាមិញ ទាក់ទងជាមួយនឹងការបាត់ខ្លួនរបស់តារាចិនរូបនេះ ពេលនេះនៅមិនទាន់ដឹងពីមូលហេតុច្បាស់នៅឡើយទេ យ៉ាងណាពេលនេះអាជ្ញាធរថៃកំពុងតែធ្វើការស្រាវជ្រាវស្វែងរកពីមូលហេតុបន្តទៀតពាក់ព័ន្ធនឹងការបាត់ខ្លួនដ៏អាថ៌កំបាំងនេះ។